Filmfestivalip naammassinnginnerani isertukulunneq

Greenland Eyes International Film Festival 2014 Nuummi kulturikkut illorsuarmi Katuami filminik assigiinngitsunik takutitsereerluni pingasunngornermi ullumi naggaserneqartussanngorpoq.

Filmili kingulleq takutinneqartussaq sunaava? Isiginnaariartussat nalunaaqutaq 21.00 tamanna paasissavaat.

- Filmimi aaqqissuisut isumaqatigiissuteqarfigereerpavut festivalip naammassineqarnerani filmi takutinneqassasoq. Aamma oqaatiginngikkallassavarput filmi sunaanersoq, festivalimi pisortaq Ivalo Frank Sermitsiaq.AG-mut oqarpoq.

Nuummi Greenland Eyes International Film Festival 2014 aggustip 29-ani aallartippoq, ullumilu pingasunngornermi naammassineqassalluni.

Klaus Georg Hansen Greenland Eyes Film Festivalimi malinnaavoq, taannalu suleqatigalugu Sermitsiaq.AG-mi allaaserisaa saqqummiunneqarluni.