Skip to main content

Filmfestivali, tusarnaartitsinerit assinillu saqqummersitsineq

Nuummi Katuami nunatsinnit nunarpullu pillugu filmerpassuarnik takutitsisoqassaaq, Greenland Eyes International Film Festival sisamanngorpat aallartippat, taannalu aallartillugu Small Time Giants aamma Pamya, Alaskameersut, tusarnaartitsissapput

Greenland Eyes International Film Festivalip sapaatip akunnerani aggersumi nunarsuarmi filmfestivalit annersaat aaqqissuutissavaa, tamatumani Nuummi Katuami Kalaallit Nunaat sammineqassalluni. Filminik takutitsisoqassaaq, eqqumiitsulianik saqqummersitsisoqassaaq, tusarnaartitsisoqassaaq, performancit aamma symposium.

Festivalimi filmit tamarmik, piffiup ingerlanerani Kalaallitr Nunaanni filmiliarineqarsimasut sammineqassapput, titartakkanik filmiliat piviusulersaarutillu, nipiersornermik videoliat, filmit aliikkutassiat filmiliallu oqaluttuarisaanermut tunngasut, assersuutigalugu Aulahuliat, 1953-imi Thulemiut pinngitsaalisamik nuutsinneqarnerat pillugu filmiliaq.

Filmit Kalaallit Nunaanni sananeqarsimapput kalaallinit nunallu allamiunit itsersuisartunit pingaartumillu sammineqarpoq Kalaallit Nunaat nutaaliorfiusoq, illoqarfeqaleriartortoq nunanullu tamalaanut sammisoq.

– 2012-imi festivali Greenland Eye IFF Berlinimi ingerlanneqarpoq, EU-p siulittaasoqarfiata kulturikkut suliniutaatut. Tamatumunnga atatillugu inuppassuit apersuutigaat festivali qaqugu Kalaallit Nunaanni Danmarkimilu ingerlanneqassanersoq. Det Danske Filminstitut attaveqarfigaara aperalugulu festivalip ingerlannissaanut soqutiginninnersut, soqutiginnippullu taavalu suut tamarmik piareersarneqarput maannalu Kalaallit Nunaanni, Danmarkimi, Savalimmiuni, Islandimi, Sverigemi, Finlandimi Norgemilu festivali angallapparput, Ivalo Frank oqarpoq.

Filmit pisoqqat nutaallu

Aaqqissuussisut filmfestivalimik takorloorpaat isiginnaartut Kalaallit Nunaat pillugu oqaloqatigiinnermi akulerutsinnissaat, maanna Kalaallit Nunaat nunarsuarmit tamarmit tusagassiorfinnit sammineqarmat uuliasiorneq aatsitassarsiornerlu pillugit oqallinnerit assigiinngitsut pissutigalugit, Danmarkimut nunarsuullu kissatsikkiartorneranut attuumassutilimmik attuumassuteqanngitsumilluunniit.

– Greenland Eyes filmit takutinneqartussat tassapput nutaat pisoqqallu, titartakkanik filmiliat, filmit aliikkutassiat, nipilersukkat filmillu naatsut kiisalu piviusulersaarutit. Filmit piffinnit assigiinngitsuneersut assigiinngitsunillu samminnittut takussavagut, isiginnaartut tamatigoortumik takutinniarlugit Kalaallit Nunaanni filmiliornermi qanoq pisoqarsimanersoq. Filmit Kalaallit Nunaanneersut nunap avataani suli ilisimaneqarpianngillat. Taamaattumillu aamma filmit pisoqaanerit takutissavagut soorlu "Da myndighederne sagde stop", Per Kirkeby-p Aqqaluk Lyngellu sanaavat, aamma "SOS Iceberg" (1933-imeersoq). Filmit piffinnit assigiinngitsuneersut takutinnerisa saniatigut, filmip kingulliulluni taaneqartup paasinarsaarineratut, aamma pingaaruteqaerpoq filmit nunanit tamalaaneersunit sananeqarsimasut takutinnissaat, tamatumuuna takutinniarlugu Kalaallit Nunaannik isiginninnerit assigiinngitsut, taamaasilluni nuna, nunatut allatulli, nunap iluanit avataanillu takutinneqarluni, Ivalo Frank oqarpoq.

Filminik takutitsinerit saniatigut Katuami tusarnaartitsissapput Small Time Giants, kingorna Pamya-kunnit malitseqarlutik, Filip Gielda-p aamma Inuuteq Kriegelip Nuuk Centerimi assinik takutitsinerat "13", aammalu Ilimmarfimmi symposium ingerlanneqassalluni ilaatigut filmiliortartoq Peter Jensen, Groenlandica-p pisortaa Charlotrte D. Andersen aamma Nivi Christensen, kulturip attatiinnarnissaanut MA, saqqummiussisoralugit.

Festivali samanngorpat aggustip 28-anni aallartissaaq tassanilu Folketingip Kalaallit Nunaannut Ataatsimiititaliaa peqataassaaq.

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER