Filippinerit feeriaqarnersiutissaminnik tunineqarsimanngitsut

Sulisartut Kattuffiata SIK-p Ilulissani suliffeqarfik sulisorisimasaminut fillipineriusunut marlunnut 118.186 koruuninik aamma 212.219 koruuninik akiliuteqarnissaa piumasarisimavaa.

Piumasaqaateqartoqarsimavoq feeriaqarnersiutissanik tunniussisoqarsimannginnera, qaangiuttoorluni sulisimanermut akiliuteqartoqarsimannginnera, piffissami aalajangersimasumi akissarsisitsisoqarsimannginnera aamma sulisuusimasut taakku marluk Ilulissani suli najugaqartut allamili sulilersimasut suli aningaasarsiassaqarnerat pissutigalugit.

Nunatta Eqqartuussiviata ukioq manna aggustip 24-ani SIK pissutsit ilaani tapersersimavaa. Taamaalilluni suliffeqarfik sulisorisimasami aappaanut 58.506 koruuninik aappaanullu 71.683 koruuninik akiliuteqartussanngorlugu eqqartuussimavaa.

Feeriaqarnersiutissanik tunniussisoqarsimannginneranut kiisalu piffissami aalajangersimasumi aningaasarsiassaannik appaasimanermut akiliuteqaqquneqarsimavoq.

Eqqartuussummik suliareqqitassanngortitsisimasoq

Unnerluutigineqartup eqqartuussut Nunatta Eqqartuussivianut suliareqqitassanngortsissimavaa. Suliaq suliareqqitassanngortinneqaraluartoq SIK-p allattoqarfiani pisortap Bjarne Petersenip nuannaarutigaa, SIK-mi ilaasortat pissutsini arlalinni taperserneqarnerat.

- Eqqartuussut pingaaruteqarpoq, tassuunakkummi aalajangersarneqarmat sulisitsisup sulisuminut qanoq pinnissinnaanera killeqarmat. Eqqartuussuttaaq aqqutigalugu, sulisut nunanit allaneersut ataqqineqartussamik pisinnaatitaaffeqarnerisa immikkut eqqumaffigineqalernissaat neriuutiginarpoq, taanna Sermitsiaq.AG-mut oqarpoq.

SIK-mit naammagisimaarneqarpoq, eqqartuussutitigut aalajangersarneqarmat, suliffeqarfiup malittarisassat atuutttut naapertorlugit sulisuminik arlalitsigut iluamik pinnissimannginnera.

- Eqqartuussut manna soorunami sulisuusimasunut marlunnut taakkununnga attuumassuteqarpoq, neriuutiginarporli tamanna Kalaallit Nunaanni sulisitsisut sulisunut nunanit allaneersunut pissusilersortarnerannut siunissami sunniuteqassasoq, allattoqarfimmi pisortaq oqarpoq.

Taamatummi aatsaat suliqartoqalinngilaq. Siusinnerusukkut suliat taama ittut tusagassiorfitsigut saqqummiunneqartarnikuupput, SIK-lu ajornartorsiutinik taama ittunik arlalitsigut assersuutissaqarpoq.

SIK isumqaraluartoq sulisitsisorpassuit sulisunut nunanit allaneersunut tunngatillugit malittarisassanik atuuttunik ataqqinnittuusut, sulisartut kattuffiannit misigineqartarpoq sulisitsisoqartoq malittarisassanik malinninngitsunik.

- SIK sulisunit filippineriusunit sulisitsisuminnit naammaginanngitsumik pineqartarsimanerminnik oqaluttuartunik 2020-mi amerlaqisunik saaffigineqartarsimavoq. Ilaatigut ullormi sivisoorujussuarmik sulisinneqartarsimapput, qaangiuttoornerminni aningaasarsitinneqartarsimanngillat aamma qasuersaarfeqarnissamut malittarisassat malinneqartarsimanngillat, taanna oqarpoq.

Qaangiuttoortarsimaneq pillugu taperserneqanngitsoq

Bjarneq Petersenip assersuutigalugit taavai, sulisut feeriartarneq pillugu inatsit naapertorlugu feeriartussaatitaanerat atorneqartarsimanngitsoq, aamma sulisut Kalaallit Nunaannut tikikkaangata aallaqqaammut isumaqatigiissutaasimasoq allanngortinneqartarsimasoq, tassa sulinermi atugassarititaasut ajornerulersinneqartarsimasut.

SIK qaangiuttoornernut akiliuteqarnissamik piumasaqaammini taperserneqanngilaq, eqqartuussivimmi nalilerneqarmat naammattumik uppernarsaatissaqartoqanngitsoq, SIK-milli neriuutigineqarpoq suliareqqitassanngortitsinermi tamanna aaqqiiffigineqassasoq.

- Aningaasarsissutiginagu sapaatip akunneranut 40 tiimit sinnerujussuarlugit sulisarsimallutik oqaluttuarnerat upperaarput, taanna oqarpoq. SIK-mit ataqqilluinnarparput suliarmik suliareqqitassanngortitsisarneq, ilaasortatsinnulli tamanna aamma kinguneqartarpoq.

- Ilaasortatta filippineriusut suliami inaarutaasumik aalajangiisoqarnissaanik utaqqeqqinnissaat uggornarpoq, Bjarne Petersen naggasiivoq.