Fight-night: "The Tank" unnummi ajugaavoq

Tilluulluni unamminerit nuannerput ilaatigullu pissanganarsilluinnartarlutik. Fight Club Nanoq arfininngornermi unnukkut tilluutsitsilluni unammisitsimmat 300-t missaat isiginnaariarput.

Tilluuttartoq nunatsinneersoq, Frank Madsen ”The Tank”-imik taaguutilik, Fight Club Nanoq arfininngornermi 25. februar tilluutsitsimmat unamminermi annermi ajugaavoq.

Fight Club Nanoq Nuummi arfininngornermi 25. februar Godthåbshallenimi tilluutsitsivoq, unammineq siulleq nal. 19.00 aallartilluni.

Tilluuttartut klubbianni siulittaasoq, Efraim Olsen ilisimatitsivoq unamminermi taekwondomik unammisoqartoq, tilluunnermik sungiusariaatsinik unammilluni marlunnik takutitsisoqartoq, tilluullunilu unamminerit arfinillit naammassineqartut.

- Pisarnertut unamminerit ajunngilluinnarput ilaatigullu pissanganarsilluinnartarlutik. Isiginnaariat 300-t missaanniipput. Naatsorsuutigisatsinniik ikinnerupput, immaqa silap atoruminaannera qaammatillu naanerani akissarsiffik sioqqullugu aaqqissuinerput peqqutaasimassalluni, Efraim Olsen ilisimatitsivoq.

Nunatsinneersoq nunani allani unammisartoq ajugaasoq

Tilluuttartoq nunatsinneersoq, Frank Madsen, ”The Tank”-imik taaguuteqartoq tilluulluni unamminermi pingaarnermi ajugaavoq. Unamminermi minutsit marluk pingasoriarlugit tilluuttoqarpoq.

- Frank Madsen, 72 kg-nik oqimaassuseqartoq timimigut, piginnaasamigut, nakkutiginnilluarnermigut sapiissuseqarnermigullu siuarsimalluinnarami ajugaavoq. Unammisaa Mads Bejder akisinermi tillussilluartaraluarpoq. Frank Madsenili tilluunnermi aalariariasaartarnermilu siuarsimaneruvoq, Efraim Olsen naliliivoq.

Frank Madsen nunani allani tilluuttartuuvoq, ilaatigut Danmarkimi Finlandimilu tilluunnermik unammisarluni.

Unamminerni allani ajugaasut:

Ivalu Hansen Piitaq Krusemut ajugaavoq

Jonathan Saustrup Emil Poulsenimut ajugaavoq

Ajith Sothilingam Inuujuk Peterseninut ajugaavoq

Piitaq Kruse Rico Vejrupimut ajugaavoq

Sebastian Dammeyer Anguteeraq Poulsenimut ajugaavoq

Tilluunnerit naggaserlugit nukappiaqqamut Asger Larsenimut, sungiusarluni tilluunnermik unnummi takutitsisimasumut, kajumissaat tilluuttartut klubbiannit tunniunneqarpoq.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS