Fieldsimi toqutaasut pingasut tassaapput 17-inik ukiullit marluk russerlu 47-nik ukiulik
Toqutaasut pingasut saniatigut inuit sisamat – marluk qallunaatut innuttaassuseqartut svenskillu marluk – saassussinerup kingorna perulupput.
Københavnimi pisiniarfeqarfissuasrmi Fieldsimi sapaammi unnukkut aallaasersortoqarnerani inuit pingasut toqutaasut tassaapput inuusuttut marluk inersimasorlu.
Niviarsiaraq nukappiararlu 17-inik ukiullit kiisalu angut 47-nik ukiulik Ruslandimiusut innuttaassuseqartoq, Danmarkimi najugaqartoq pineqarput.
Københavnip politiivini chefpolitiinspektøri Søren Thomassem tusagassiortunik ataasinngornermi ullaakkut katersortitsinermi taama ilisimatitsivoq. Inuit sisamat allat aamma eqqorneqarput.
Sisamat peruluttut
Qallunaatut innuttaassusillit marluk, arnaq 40-nik ukiulik, arnarlu 19-inik ukiulik, svenskisullu innuttaassusillit marluk, angut 50-inik ukiulik, niviarsiararlu 16-inik ukiulik. Tamarmik perulupput, aniguissagunarlutilli, chefpolitiinspektøri oqarpoq.
Inuit arlaqartut allat aamma annertunngitsumik ajoquserput.
Inuit pingasut aallaaneqarlutik toqutaasut Søren Thomassenip oqaatigaa. Sisamat ikilerneqartut aamma aallaaneqarsimapput, ajoqusertullu sinneri aallaaneqarsimanatik, taanna oqarpoq.
Nalaatsortumik eqqorneqartut
- Nalaatsortumik eqqorneqarsimasutut nalilerpagut. Kikkuunerat apeqqutaatinnagu eqqorneqarsimapput, politiinspektøri oqarpoq.
Eqqorneqarsimasut pillugit videoliat siammarterneqannginnissaat chefpolitiinspektørip kaammattuutigaa.
- Siullermik pillaatiginnissutaasinnaavoq, aappaattut eqqugaasunut eqqarsaatigineqartariaqarput. Taamaammat sakkortuumik qinnuiginnippugut.
Aallaasertoqarnera Fieldsimi sumiiffinni marlunni pisimasoq, politiit ilisimatitsipput.
Peqqarniisaarniartoqarneranik takussutissaqanngitsoq
Aallaasersortoqarnerata kingorna angut 22-nik ukiulik politiinit tigusarineqarpoq. Søren Thomassenip oqarnera naapertorlugu killisorneqareerpoq.
- Pasineqartoq killisiorparput. Tassaniissimalluni ilisimatitsissutigaa, taanna oqarpoq.
Suna pissutigalugu taamaaliorsimanera chefpolitiinspektørip oqaatiginianngikkallarpaa. Peqqarniisaarniartoqarneranilli politiit maanna takussutissaqanngitsoq ilisimatitsissutigaat.
22-nik ukiulik toqutsisutut unnerluutigineqassaaq, taannalu tarnimikkut napparsimasut sullissiviannit ilisimaneqareerpoq.