Festivalimik aaqqissuisoq: Ukiut pitsaanerpaat ilaat
Sapaatip akunnrata naanerani NuukKap Extreme Running Race aamma Kapisillit Festival ingerlanneqarput, aaqqissuisullu ukioq manna aaqqissuussamik naammagisimaarinnilluarput. Martin Møller ungasinnermut arpanninnermi ajugaaqqippoq.
Umiatsiat 110-ngajalluinnarnik amerlassusillit ukioq manna Kapisillit Festivalertitsinermut ornigussimapput, Jens Kristian Berthelsen, timersortarfinni Inussivimmi Nuummilu Illorsuarmi pisortaq oqarpoq.
Timersortarfiit NuukKap Extreme Running Racemik arpannerullu naanerani Kapisillit Festivalimik aaqqissuisuupput.
Jens Kristian Berthelsenip oqaatigaa, ukioq 2020, corona ajornartorsiortitsigaluartoq aaqqissuussanut taakkununnga marlunnut pitsaalluinnartumik inerneqarsimasoq:
- Ajunngilluinnartumik ingerlasimavoq. Ukiullu aaqqissuussiffiusartut pitsaanerpaat ilagisimavaat, Jens Kristian Berthelsen Sermitsiaq.AG-mut oqarpoq.
Pisuttuarneq iluatsilluarsimasoq
Festivalertitsineq tapersersorneqarluaqaaq, taanna oqaluttuarpoq:
- Nuannersimaqaaq. Meeqqanut pississaarfeqarlunilu pisuussutinik ujaasitsisoqarpoq. Sila pitsaavallaarsimanngilaq, qujanartumilli unnukkut arfineq-pingasut missaanni, nipilersortussat suli allartinngitsut silagissivoq, Jens Kristian Berthelsen oqarpoq.
Angusat
110 km-imi arpanneq:
1. Martin Møller atorsimava 16 timer 00 min.
2. Thure Tornbo Baastrup 20 timer 57 min.
3. Mattias Törnquist 26 timer 20 min.
Arnat etapet pingasut atorlugit 110 km-ini arpannerat:
1. Nivi Hansine Geisler 18 timer 56 min.
2. Miiti Geisler 20 timer 15 min.
3. Gitte Hansen Drachmann 23 timer 17 min.
Angutit Mænd etapet pingasut atorlugit 110 km-ini arpannerat:
1. Michael Clasen 17 timer 52 min.
2. Adam Goleatsen Wille 18 timer 56 min.
3.-ngortut marluusimapput Asmus Jessen Rubæk aamma Anders Bjørn Larsen 20 timer 5 min.
Taassuma oqaluttuaraa, Nuummiit Kapisilinnut arpannissamut aatsaat taamak amerlatigisut peqataanissamut nalunaaruteqarsimasut, arlaallu pisinnaajunnaassagaluarpat ilaanissamut utaqqisorpassuaqarsimasoq.
Ukioq manna aaqqissuisut aaqqissuussat saniatigut, Qooqquniit Kapisilinnut 40 kilometerisut isorartugigisumi pisuttuartitsinermik aaqqissuussisimasut. Taamatullu aaqqissuussisimaneq tigulluarneqarsimavoq, tassani inuit 40-t missaanniittut peqataasimallutik.
Nunanit allaniit peqataasussat taamaatitsiinnartariaqarsimasut
Isorartunerpaamik arpatsitsinermi, Nuummiit Kapisilinnut 110 kilometerisut isorartugisumi Martin Møller Nuummeersoq nalunaaquttap akunneri 16-it arpannermini atorlugit ajugaasimavoq.
Martin Møller sisoraatinik ujakkaarnermi ilisimaneqarnerungaluarpoq, taanna Ukiuunerani OL-imut siusinnerusukkut peqataasarsimavoq.
Jens Kristian Berthelsen naapertorlugu, peqataasussat arlallit ilaatigut Frankrigemeersut arpaqataanissamut ilaaniarlutik nalunaaruteqarsimapput, coronalli nunarsuarmi tuniluunnera pissutigalugu Europamit arpattussat tikissinnaasimanngitsut. Pisortalli upperaa, nunanit allanit arpaqataaniat aappaagu misileeqqissasut.