Faxe Kondi GIF-ilu ukiuni 50-ini suleqatigiinnertik nalliuppaat
Faxe Kondi aamma Kalaallit Nunaanni Timersoqatigiit Kattuffiat saqqalianik nipitittakkanik immikkuullarissunik eqqaamasanillu nuannersunik saqqummius-sinikkut ukiuni 50-inngortuni suleqatigiinnerminnik malunnartitsillutik nalliuttorsiorput.
Ukiut 50-inngorput Kalaallit Nunaanni Timersoqatigiit Kattuffiat aammalu Faxe Kondi siullermeerlutik Kalaallit Nunaat tamakkerlugu timersorumanermik siammarsaaqatigiinniarnermik isumaqatigiissuteqarmata.
Taamatut angusaqarneq ilaatigut malunnartinniarneqarpoq ukiut ingerlanerini nuannersunik oqaluttuanik saqqummiussaqarnikkut tamatumalu sanitigut Faxe Kondi ukioq 2021 tamaat imeruersaatip Faxe Kondip allagartaanik immikkut ilusilersukkanik nipititsiortortarnikkut aammalu kalaallip ilusilersuisartup ilisarisimaneqarluartup atisaliaanik saqqummiussaqarnikkut, Kalaallit Nunaanni Timersoqatigiit Kattuffiat tusagassiutinut nalunaarummi allappoq.
- Bibi Chemnitzip atisaliamigut piumaneqaqisutigut Naalagaaffeqatigiinneq malunnartippaa. Royal Unibrew-miillu pingaartipparput, suliffeqarfittut Kalaallit Nunaat tamakkerlugu malunnaatilimmik pimoorussaasumillu suleqataanissarput, pisartunik pilersaarutinillu tunuliaqutseeqataasarnikkut, nunami Faxe Kondip imeruersaatit akornanni tunisaanerpaaffigisaani, Royal Unibrew-mi Export Area Manager Jørgen-Anker Ipsen oqarpoq taamallu oqarnermini Kalaallit Nunaanni Timersoqatigiit Kattuffianni siulittaasumit, Nuka Kleemann-imit, ilalerneqarluni:
- Faxe Kondip tunuliaqutsiilluni aningaasaliisartorineratigut timersoqatigiit peqatigiiffii nunarput tamakkerlugu sumiiffinni tamani, allaat nunaqarfeeqqani 50-iniit 100-nut inoqartuni peqataavugut, peqatigiiffiit timersornerminni atisartaarsinnaanermik qinnuteqarsinnaatinnerisigut . Tamannami suni assigiinngitsuni nuannaarutaasarpoq ilaannummi unamminerni atisassanik pissarsiniarsinnaaneq imannanngitsuusinnaasarmat. Nuannaarutigisarpara nunap immikkoortuini assigiinngitsuni peqatigiiffiit ilaasortaat unamminerminni uatsinnit atisat atorlugit tulluusimaarlutik peqatigiiffitik sinnerlugit peqataagaangata.
Ingerlaavartumik annertusarneqartuartoq
Timersoqatigiit kattuffiata imeruersaatillu ilisimaneqarluaqisumik qorsummik puiaasartaqartup suleqatigiinnerat 1971-imiilli annertusarneqartuarsimavoq, nalinginnaasumik marlunnik suliniutinik imaqartumik.
Siulleq tassaavoq ”Faxe Kondi Puljen”, timersuutinik atisarsiniarnissami tapiiffigineqarnis-samik peqatigiiffinnit qinnuteqarfigineqarsinnaasoq. Aappaattullu taasassaq tassaavoq ukiumoortumik Faxe Kondimit qiimmassaasiissutaasartut, Ukiumi sungiusaallammammut, Ukiumi aqutsisuullammut aammalu Ukiumi timersullammammut tunniunneqartartut. Qiimmassaaserneqarlutik nersorneqartut persuarsiorpalaartumik TV-kkut aallakaatitsinikkut avammut nittarsaanneqartarput taaneqartumi ”Maligassiuisut”. Tassanilu tassa inuit timersornikkut peqqissuunissamillu suliniuteqartut, tunniusimallutik maligassiuisut persuarsiutaasumik saqqummiunneqarlutik persuarsiutigitinneqartarput.
Kiisalu Faxe Kondi ukiuni kingullerni 25-inik amerlanerusuni arnat assammik arsatartut unammisinneqartarnerat ”Faxe Kondi Cup” GSS qanimut suleqatigalugu ingerlanneqartarpoq.
- Pisartuni peqataasarnitsigut Timersoqatigiit Kattuffianit nunarsuarmi Kalaallit Nunaat timimik aalatitsinerpaaffinngornissaa anguniarlugu takorluugaa tunuliaqutserneqarpoq, taamatullu peqataaneq Faxe Kondip immineq ”Når de går sport i den”-imik taallugu takorluugaanut naapertuulluinnarpoq, Jørgen-Anker Ipsen, ukiorpaalunni immineq nunatsinni najugaqarsimasoq, nassuiaateqarpoq.
Timersoqatigiit Kattuffiata Faxe Kondillu isumaqatigiissusiaat ukioq 2021-ip tungaanut atuuppoq tamatumalu kingorna sivitsorsinnaanera pillugu isumaqatiginninniutaaqqittus-saalluni.
- Faxe Kondi nunatsinni timersornermut ukiut ingerlanerini annertuumik tunniussaqartarsimavoq oqaluttuarisaanermilu suleqatigiinnerput qiviaraanni suli suleqatigeeqqissinnaanerput takorlooruminartuuvoq, Nuka Kleemann oqarpoq.