Fagchef: Atuarfimmi pissutsit nakkutigeqqissaarpagut
Atuarfik Hans Lyngemi sulisut soraarartarnerat pinngitsoortinniarlugu iliuuseqarnissamut ukioq atuarfiusoq ilivitsoq periarfissaqartinneqarsimavoq. Amerlanerusulli suli soraararput. Suliniutit maanna nalilersorneqassapput.
Kommuneqarfik Sermersuumi atuarfeqarnermut immikkoortortami fagchefip Atuarfik Hans Lyngemi sulisut soraararsimanerat ilisimalluarpaa.
Ajornartorsiutit aaqqinnissaannut atuarfimmi pisortaqatigiit iliuuseqaqquneqarsimapput. Sulisut atorfeqartiinnarnissaannut iliuuseqartoqassasoq kommuni piumasaqarsimavoq paasinarsimmat ukioq atuarfiusumi 2021/2022-mi ilinniartitsisut qulit soraarsimasut. Kisitsisit taakku paasineqarmata kommunimi ingerlatsivimmi amerlaginartinneqarsimapput.
- Kisitsisilli maanna pigilikkagut takutippaat suli amerlanerusut siorna soraarsimasut. Ukioq atuarfiusumi kingullermi ilinniartitsisut amerlanerusut soraarsimapput. Ilinniartitsisut pikkorissut soraajortornerat soorunami uggornarpoq, fagchef Riikki Grønvold Sermitsiaq.AG-mut oqaluttuarpoq.
Ataatsimeeqatigineqassasut
Kommuneqarfik Sermersuumut Sermitsiaq.AG-mut kisitsisinik piniarnermini paasivaa Atuarfik Hans Lyngemi ilinniartitsisut naatsorsuunneqartuni 48-suni ukiuni atuarfiusuni marlunni 26-t soraarsimasut. 2021/2022-mi qulit, aamma 2022/2023-mi 16-it.
Ilinniartitsisut amerlavallaartut soraajortorsimanerat pillugu atuarfiup pisortaa kommuninut ataatsimiinnissamut aggersarneqarsimavoq.
- Atuarfeqarnermut immikkoortortaqarfiup atuarfimmi pisortaqatigiit ataatsimeeqatigiumallugit aggersareernikuuai, atuarfimmi suliniutit oqaloqatigiissutigineqassallutik. APV-mik misissuisimanermi inernerit atuarfiup pisortaata saqqummiutissavai, tassanilu aamma suliniutit iluatsittut saqqummiunneqassapput kiisalu suliniutit iluatsinnerusinnaasut nalilersorneqassallutik, fagchefi oqarpoq.
Pissutaasut ilisimaneqanngitsut
Riikki Grønvold ilisimatitsivoq Atuarfik Hans Lynge ilinniartitsisunik arfinilinnik maanna amigaateqartoq. Ilinniartitsisut maanna atorfeqartut ilaat atorfimminni akunnerit ilinniartitsinissamut atugassatik saniatigut akunnerni amerlanerusuni maanna ilinniartitsisarput, atuartut atuartinneqarnissaat naammassisinnaaniassammata.
Fagchefip erseqqissarpaa Atuarfik Hans Lyngemit ilinniartitsisut taama amerlatigisut soraarsimanerat sumik pissuteqarnersoq kommunip ilisimanngikkaa. Atuarfiulli pisortaqatigiivi piumaffigineqarsimapput soraartoqalertillugu ilinniartitsisoq soraarniuteqarsimasoq oqaloqatigineqartalissasoq, suna pissutaanersoq paasineqarsinnaaniassammat.
- Ataatsimiinnermi qularinngilara suut pissutaanersut paasisaqarnerussalluta. Atuarfiup misissuititsisimaneri tunngavigalugit suli allanik paasisaqarnerujumalluta, nammineq misissuititsinissaq pilersaarutigissallugu aamma piareersimavugut, oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...