Facebookimi nanisiaq
Facebookikkut unammisaqattaarut politiit sakkortuumik mianersoqqussutigaat
Imaanut aqqarnissamik unammilleqattaarulluni nanisiarineqartoq navianarluinnartuusinnaammat politiit mianersoqqussutigaat
Inuit namminneerlutik imaanut aqqareerlutik annaanniartariaqalerpata, tamanna annaassiniaanermi aningaasartuutinik annaanniarneqartut akiliisussanngortinneqaatigisinnaavaat. Politimestereqarfimmi unnerluussisuuneq Morten Nielsen piffissami kingullermi Facebook aqqutigalugu imaanut aqqarnissamik unammilleqattaarutaalersoq pillugu oqarpoq.
Takuuk: Video: Nick Nielsen aamma inuppassuit allat immamut pissittut
Unammilleqattaannermi inuit aqqisigut taallugit unammillerneqartarput ajorsartullu immiaaqqanik karsimik pillertussanngortitaasarlutik. Unammillertoq uppernarsaatitut imaanut aqqarnermini videoliaritittarpoq unammillertittullu aamma taamaasiortussaapput allallu unammillerlugit. Ilaat imaanut toqqaannartumik tigisarput ilaalli naloraarlutik sekundialunni morsuffiusinnaasoq ornittarlugu.
Akisusinnaavoq
- Sakkortunerpaamik inassutigerusupparput imaanutt tiginermi nalunnguarnermiluunniit imigassartorsimalluni taamaasiortoqanngilluinnarnissaa. Tamanna inuunik inuunerata navianartorsiorneranik kinguneqarsinnaavoq, Morten Nielsen Sermitsiaq.AG-mut oqarpoq.
Annaanniarneqarnissaq pisariaqalissappat tamanna pineqartumut akisusinnaavoq.
- Nammineq pisuussutigisamik annaanniarneqartariaqalerneq aningaasartuutaasunik akiliisussanngortinneqarnermik kinguneqarsinnaavoq. Taamatulli unammilleqattaanneq inatsisinik unioqqutitsinerunngilaq uanimi inuit pinngitsaalillugit imaanut aqqartinneqanngillat. Aamma inoqarpoq ukiuunerani imaani nalunnguartartunik imaanilu nalunnguarnermut inatsisitigut killilersuisoqanngilaq. Sianigisariaqarporli sumiiffikkaartumik malittarisassaqarsinnaammat umiarsualivimmi nalunnguarnissamik inerteqquteqartitsisumik, Morten Nielsen oqarpoq.
Taassuma inassutigaa taamatut imaanut aqqassagaanni immap naqqanut tummarfiusinnaasumi pissasoq aammalu inunnik ikiuukkasuarsinnaasunik najuuttoqartillugu aatsaat taamaasiortoqartassasoq.