Faaborgimi umiarsualivimmi kalaallit ulloqartinneqartut
Faaborgimi Havkajakklubben Malik-mi piumassuseqarluartut piinsimi Faaborgimi umiarsualivimmi kalaallit ulloqartitsinerannik aaqqissuisuupput
Aqqusineeqqani kalaallit erfalasuat takussaavoq, taamaalilluni kalaallinut ulloqartitsinerup sumi ingerlanneqarnera paatsuugassaanngilaq.
Aaqqissuisut ulloq eqqorluarsimavaat. Piinsimi ukioq manna maannamut aasaanerani aatsaat taama silagitsigaaq. Faaborgimi umiarsualivik seqinnarippoq inuppassuaqarlunilu.
Hanne O’Reilly aamma Knud Buch Kajakklubben Malik-meersut kalaallit ulloqartinneqarnerannik aaqqissuisuupput. Eqqumiitsulianik, nuersakkanik, pinnersaasianik aamma sanalukkanik assigiinngitsunik tuniniaaveqarpoq. Hanne O’Reillyp marriani saqqummersippaa. Ellen Svendsen ilaatigut puisip amiinik sulianik tuniniaavoq, Knud Buch qasusuilluni kalaallit qajaannik qanoq sanasoqartarnersoq soqutiginnittunut oqaluttuarpoq. Soqutiginninnerlu annertuvoq.
Ajornarpallaanngilaq
Ilitsersuisoqarluni ukiuunerani Kajakklubben Malimmi Faaborgimi qaanniortoqarsinnaavoq. Sapaatip-akunneranut ataaseriarluni aggertoqartarpoq, akunnernilu 100-t missaanni sulisoqartarpoq, atortussanillu 3.500,00 koruuninik akiliisoqartarluni, upernaakkullu qajaq piareerneqartarpoq.
Kajakklubben Malik-mi suna pineqarnersoq ilisimaneqarpoq. Klubbi 2. september 1992 pilersinneqarpoq, ukioq mannalu ukiunik 30-nik nalliuttorsiortoqarpoq. Ukiumut agguaqatigiissillugu qaannat qulit sananeqartarput. Klubbi 90-inik ilaasortaqarpoq, kalaallillu ulloqartinneqarneranni 3-4-nik ilaasortartaarnissaq neriuutigineqarpoq.
- Taamaammat qaannat 300-t missaanniittut ukiut ingerlanerini sananeqarput, Knud Buch tulluusimaarluni oqarpoq.
Knud Buchip qaannamik peqarniaraanni periuseq taanna eqqortuusoq qularutiginngilaa.
- Soorunami pisiniarfiliartoqarsinnaavoq. Qajarissamik, annanniummik paatinillu pisilluni, 12.000,00 koruuninik akiliilluni, akunnerullu ataatsip iluani imaanut ingerlalluni.
- Nammineq qaanniorluni tulluarsaalluni, akunnerpassuit suliniuteqaraanni, taava immikkuullarissumik misinnartarpoq, Knud Buch oqarpoq.
Qaanniornissamut periarfissaq
Eleonora Karlsen, Napasumeersoq maanna Danmarkimi najugaqartoq, soqutiginnittorujussuit ilagaat.
- Qaanniornissamik takorluugara takorluukkanni annersaavoq, Eleonora Karlsen, Sermitsiaq.AG-mut oqarpoq.
Siunissami qaninnermi Faaborgimi kalaallinut ulloqartitsinermik suliaqartut ulloq nalilersorniarpaat, suliniullu nuannersoq aappaagu aaqqissoqqinneqassanersoq aalajangiiffigineqassaaq.
Ukioq manna ulloqartitsineq nereqatigiinnermik naggaserneqarpoq.