F16-it Nunatsinni misiligarneqarnerat iluatsinngitsoq

F-16-inik Nunatsinni timmisartornerit siulliit takutippaat taakkua SAR-imik ingerlatsinermut imaluunniit nakkutilliinermut naleqqutinngitsut. Tamanna Ingeniørenimi allaaserisami atuarneqarsinnaavoq.
F16-ini Kalaallit Nunaat qulaallugu sensorsysteminik misileraanisamik pilersaarutit taamaatiinnarneqarput, timmisartut orsussaannut tankit nutaat inituallaaqimmata, allaaserisami allassimavoq.
Qallunaat timmisartuisa malersuutit F-16-it Kalaallit Nunaata qulaani sumiiffiit timmisartorfigineqarsimanngisaannartut timmisartorfigaat.
Assersuutigalugu Kangerlussuup aamma Pituffiup akorrnanni 1.313 kilometerinik isorartutigisumi timmisartornermi orsussamik atuineq pingaaruteqarpoq.
– Pilersuinikkut annertoorujussuarnik unammilligassaqarpugut, isumaliutigisariaqarparpullu timmisartunik malersuutinik Kalaallit Nunaanniititsinissaq isumassaqaerpoq, assersuutigalugu naammattumik orsussaqartuaannassaagut miffissamik nutaamik toqqaassagutta, orsussarlu pisariaqartinneqarpoq kabinimilu anersaartornermut ilti nassartariaqarpavut, Søren Andersen Ingeniørenimut oqarpoq.

Sensoreqanngilat
Nunatsinni paasissutissiissutigineqarpoq F16-it ujaasinernut annaassiniarnernullu (SAR) misiligarneqassasut aammalu nakkutilliinermut assiliornermullu sungiusartinneqassasut.
Sakkutuulli sensorit, SAR-imik ingerlatsinernut atatillugu inunnik nassaarinnittussat, nassarnissaat taamaatiinnartariaqarsimavaat.
Taakkua cylinderiupput 1 1/2 meterinik takissusillit 20 centimeterinillu diameterillit, timmisartup saarpaani talerpiatungaanut inissinneqartussat atortullillu soorlu assiliissutinut infrarød laser-imik, sumiiffinnik assiliorsinnaasunik inunnillu imaani nassaarinnissinnaasunik. Taakkua nassarneqarsinnaasimanngillat, pissutigalugu Kalaallit Nunaanni timmisartornermi timmisartut suluisa ataani orsussamut tankit immikkut angissusillit pisariaqartinneqarmata, taakkualu Sakkutuut Belgiamit pissarsiarisimavaat, Ingeniørenimi allaaserisami allassimavoq.
Allaaserisaq naapertorlugu Søren Andersen isumaqarpoq F16-it sensorilerlugit orsussamullu tankilerlugit atorneqarsinnaasut, taakkuali marluutillugit atorneranni timmisartup aalajaassusiata ingeniørinit misissorneqarnera utaqqineqartoq.

Nakkutilliineq
Sakkutuut maanna nalilissavaat F16 Kalaallit Nunaanni atussanerlugit, F16-illu Nunatsinni atorneqaqqinnissaannik nutaanik pilersaaruteqanngilaq. Timmisartut malersuutit pingasut Danmarkimut utereerput.
Nunap iluani ingerlatanut pisortaq oberst Peter Boysen Ingeniørenimut oqarpoq timmisartut Hercules aamma Challenger kiisalu satellittit F16-ininngarnit nakkutilliinermut atussallugit pitsaanerusut.
– Issittumiinnitsinnimi pineqarpoq tamaani suliniutitta nalinginnaasumik nukittorsarnissaat, illersornissamullu isumaqatigiissummi toqqaannartumik allassimavoq timmisartornerit tamakkua ingerlatissagivut. Taamaattumik taamaasiorpugut, taanna ingeniørenimut nassuiaavoq.
Søren Andersenip naatsorsuutigaa Sakkutuut ukiuni aggersuni sapaatip akunnerani ataatsimik marlunnilluunniit sivisussusilinnik sungiusarlutik timmisartortassasut, aamma sumiissusersiorneq atsissukkullu timmisartorneq sungiusarneqartassallutik.