Extreme E pillugu ataatsimiisitsineq ornigarneqarluartoq
Extreme E pillugu Qeqqata Kommunia Kangerlussuarmi innuttaasunik ataatsimiisitseqqammerpoq. Ataatsimiinnermi 60-it missaat najuupput.
Elbiilit suunuku? Aaqqissuussami eqqakkat kiap isumagissavai? Kangerlussuarmi Extreme E-mik biilinik sukkaniulluni ingerlaartoqalerpat misiliisoqarsinnaava?
Apeqqutit taakku Kangerlussuarmi innuttaasunit ilaatigut apeqqutigineqarput Extreme E pillugu ataatsimiisitsisoqarmat. Extreme E-miit Kester Wilkinson aamma Qeqqata Kommunia ataatsimiisitsivoq.
Silap pissusaata allanngoriartornera takutinniarneqarpoq
Extreme E-mik sukkaniunnissat Kangerlussuarmi 28.-29. august ingerlanneqassapput, Akuliarusersuup kuuani, Kangerlussuarmit kangimut 20 kilometerisut ungasitsigisumit aallartissallutik.
Extreme E inoqajuitsumi aamma sukkaniussimavoq, maannalu nunatsinniissalluni.
- Extreme E Kangerlussuarmi sukkaniunnermik takutitsiinnassanngilaq,
silaannaalli allanngoriartorneratigut Kangerlussuarmut Kalaallit Nunaannullu qanoq
allannguitiginersoq, kiisalu nunarsuup sinneranut qanoq sunniuteqarnersoq pillugu
oqaluttuassaaq, nassuiaatigineqarpoq.
Isiginnaartut milliardilikkaat
Extreme E nunatsinni ingerlanneqarpat nunarsuarmi tamarmi maluginiarneqartussaavoq. Aaqqissuisut naatsorsuutigaat Kangerlussuarmi ingerlaartoqalerpat TV-mik aallakaatitassiorfiit ikinnerpaamik 75-it nunatsinnut tikissasut ilanngutassiiartorlutik.
- Extreme E-mi sukkaniunnermut isiginnaariartoqarnissaa siunertaanngilaq, sukkaniunnerli
silaannaallu allanngoriartornera pillugu oqaluttuarineqartut, nunarsuarmut tamarmut
takutinneqassallutik.
Innuttaasunit tapersersorneqarneq
Aaqqissuussaq iluatsissappat, TV-millu aallakaatitassiortorpassuit tikissinnaassappata, aaqqissuisut innuttaasunit tapersersorneqarnissaminnik pisariaqartitsipput. Produktion Service Scandinavia, Extreme E-mit toqqarneqarsimasoq sumiiffissanik misissueqqullugu, ilisimatitsivoq siniffissat biilillu innuttaasunit attartorneqarnissaat pisariaqarumaartoq.
Qeqqata Kommunia ilisimatitsivoq Extreme E aamma Production Service Scandinavia 14.-24. juni Kangerlussuarmukaqqissasut aaqqitassat kingulliit naammassiartorlugit. Sukkaniuttartoq tyskeq, nunarsuaq tamakkerlugu ilisimaneqartoq, Timo Schneider Akuliarusersuup kuuaniit aallarluni aqqutissamik suliaqartuujumaarpoq.