Pituffik

Exelis Services: Allanit pigineqanngilagut

Suliffeqarfiup Exelis Servicesip Pituffimmi kiffartuussinissamut isumaqatigiissuteqarnermini Kalaallit Nunaannut Danmarkimilu akileraartarnissani naqissuserpaa. Aamma Pituffimmi sulisorineqartut sulisinneqaannarnissaat suliffeqarfimmit nalunaarutigineqarpoq

Inatsisit naapertorlugit sulisoqassaaq - isumaqatigissuteqarnermi Exelis Services danskit suliffeqarferissavaat.

Tamanna suliffeqarfiup oqaaseqartartuata Kim Rubergip oqaatigaa.

Suliffeqarfiup amerikarmiunit Vectrusimit pigineqartuunera pissutaalluni isornartorsiorneqartareerpoq. Danmarki USA-lu isumaqatigiissuteqartareerpummi Pituffimmi kiffartuussinissamut isumaqatigiissuteqarfigineqartut Danmarkiminngaanniinngikkunik Kalaallit Nunaanninngaanneertuussasut. Isumaqatigiissut 2,5 millard koruunit missaannik naleqarpoq.

Danskit nunanut allanut ministeriata Martin Lidegaardip Radikale Venstremeersup USA-p Danmarkimi aallartitaa Rufus Gifford ataatsimeeqatigisareerpaa. Isumaqatigiissutip unitsinneqarallarnissaa ministerimit ataatsimiinnermi piumasarineqarpoq.

Politikkikkut oqallinnermi Kim Ruberg akoorusunngilaq. Inatsisilli tunngavigalugit kiffartuussinissamut isumaqatigiissummut qinnuteqartoqarsimasoq oqaatigaa. Suliffeqarfik sullissisussatut toqqarneqartareerpoq.

- Pitsaasumik isumatusaartumillu qinnuteqarpugut. Aningaasatigut inissisimalluarnerpaavugut qinigaareernitta kingorna. Aamma uagutsinnut nalunaarutigineqareerpoq inatsisit naapertorlugit suleriuseqartoqarsimasoq, Kim Ruberg Ritzauimut oqarpoq.

Suliffeqarfik allanit pigineqarpa?
- Exelis Services suliffeqarfimmit allamit pigineqarnera pissutigalugu isornartorsiorneqartareerpoq. Tamanna qanoq oqaaseqarfigisinnaaviuk?

- Taamatut oqartoqarnera kukkuneruvoq. Danskit inatsisaat malillugit qinnuteqarpugut. Danskit suliffeqarfiutaattut allaqqalluta qinnuteqarpugut. Taakku malittaralugit qinnuteqarpugut. Suliffeqarfipput danskit suliffeqarfiutigaat, Kim Ruberg oqarpoq.

Exelis Servicesimi pisortaq Vectrusip siulerlsuisuini ilaasortaavoq. Exelisimi siulittaasoq Vectrusimi aningaasaqarnermut siulittaasuuvoq aamma siulersuisunut ilaasortaasut Vectrusimeersuupput. Suliffeqarfimmi allanik atorfilittaqanngitsoq paasissutissani takuneqarsinnaavoq.

Ilumuunnginneraaneq
- Taava sooq oqaatigineqassava allanit suliffeqarfik pigineqanngitsoq?

- Qinnuteqaateqarnermi danskit suliffeqarfiannik aallartitsisoqarpoq. Kiffartuussinissamut isumaqatigiissummik tunineqareernermi kingorna suliaq taamaasilluni ingerlalertarpoq. Danskit suliffeqarfii nunani allani taamatut aamma suleriuseqartarput.

- Annikitsumik aallartisaasoqaqqaartarpoq. Allaffissorneq aallartittarpoq taamaattumik mikisumik Havnegademi allaffeqarfeqarpugut suliffeqarfiit allat peqatigalugit.

- Kiffartuussinissamut isumaqatigiissummik tunineqarpugut. Atorfinnik qinnuteqarfigineqarsinnaasunik pilersitsivugut aamma Nuummi allaffeqarnissarput anguniarparput. Suliffeqarfik alliartorpoq. Danmarkimi sisamanik - tallimanilluunniit sulisoqaqqaassaagut. Kalaallit Nunaanni sulisorineqartut amerlanerussapput, tassanimi sulinerup annersaa ingerlassaaq.

Sulisorineqartut taakkuuginnassapput
- Taakku sulisut sisamat tallimalluunniit suliffeqarfiup anginerulernissaa sulissutigissavaat. Isumaqatigiissummik peqalernitta pissutigisaanik nunani avannarpasinnerusuni sulisoqalernissarput sulissutigissavarput, Kim Ruberg oqarpoq.

- Danskit suliffeqarfigaatigut. Taamaattumik Danmarkimi Kalaallit Nunaannilu akileraartassaagut. Sakkutooqarfimmi sulisorineqartut atussavagut. Danskit aningaasarsiaritittagaannik akissarsiaqartinneqassapput sulinermilu inatsisit aamma taamaaginnassapput.

- Ilinniartunik sullissinerit atuuttut ingerlatiinnarneqassapput. Kiffartuussinissamut isumaqatigiissut maannakkut atuuttoq malillugu sulisoqassaaq. Suliffeqarfiuvugut ajunngitsumik siunertaqartut, oqarpoq.

Powered by Labrador CMS