isorliunerusut
Evaldsenip siunnersuut tapersinngilaa: Sipaarpugut
Borgmesterit pingasut atorfiit nuunneqarnissaannik siunnersuutaat, 'Sineriammik aamma Nuummik', akerleriisitserpalaarpallaaqaaq, Demokraatit siulittaasuat oqarpoq
Nersutaatit nerisarfiat imaarukkaangat, ajorsaatillit aaqqiagiigunnaartarput.
Ussat qangarnisaq taama nipeqarpoq, taassuma politikerit akornanni nunap karsianik amigartooqattaarnerup kinguneranik sakkortuumik oqallinnermik pilersitsisinnaasoq assersuutigilluarsinnaavaa.
Kommunit akornanni akerleriinneq
- Kommunit oqaloqatigiinnissaminnik amigaateqarnerat ersarippoq. Siunnersuummi tassani 'sineriak aamma Nuuk' akerleriitsinniarpallaarneqarpasippoq.
Demokraatini siulittaasutut qinigaarlaaq, Randi Vestergaard Evaldsen, ullumi Sermitsiaq.AG-mut taama oqarpoq.
Taassuma erseqqissarpaa, uani suliami partiimi siulittaasutut oqaaseqarluni, aningaasaqarnermut naalakkersuisutuunngitsoq.
Akisussasoq
- Inuiaqatigiit agguagaat unammissutiginagit annertusinissaa sulissutigisariaqaripput isumaqarpunga. Atorfiit nuunneqarnissaasa akeqarnissaa ajoqutigaa, inuiaqatigiillu agguagassaasa annikinnerulersinneqarnerannik kinguneqarsinnaalluni.
Atuaruk: Borgmesterit nalunaarusiaat uani atuaruk
Nunatta aningaasaqarnermut naalakkersuisortaavata Hermann Berthelsenimit (S), Jørgen Wæver Johansenimit (S) aamma Ole Dorphimit (S) 'nuussinissamik siunnersuut' suliarilluagaannginnerarpaa.
Piviusorsiunngitsoq
- Taanna aningaasaqarnikkut aamma inuiaqatigiinnut iluaqutissaqartariarpoq, iluamillu misissorneqartariaqarpoq. Una nalunaarusiamik taasaq saqqummiunneqartoq, piviusorsiortumik tunngaveqanngilaq, tigulaapallagaannartullu isikkoqarpoq, Randi Vestergaard Evaldsen oqarpoq.
Pisortani atorfiit nuussorneqarnissaat isumassarsiatsialaanngitsoq isumaqarpit?
- Taanna maannakkorpiaq akisinnaanngilara, taamaakkaluarpammi kommunit saqqummiussaattut ersernerlutsigisumik akissuteqassagaluarpunga. Tamanna pineqartoq misissorluartariaqarparput, misissussavaralu.
Taamatut iliorani siunissamik naligiiffiunerusumik pilersitsiniaraanni qanoq iliortoqarsinnaagaluarpa?
- Suliffeqarfiit nuunneqarnissaannut isumassarsiaq ajoriffissaqartinngilara, kisiannu una tunngavik piviusorsiunngippallaaqaaq.
Illoqarfiit pingaarnersaata illoqarfiillu sinnerisa naligiinnerulersinneqalinngippata, Kalaallit Nunaanni mumisitsisoqaratarsinnaasoq Hermann Berthelsen oqaatiginikuuaa. Aaqqiagiinngittoqarneranik oqaaseqarnera ilumuunngila?
- Illoqarfinnit minnernit illoqarfinnut anginernut nuussornermut nunarsuarmi tamani pisup assigisaanut iliuuseqarsinnaanngilagut. Kisianni kommunit kajumissaarusuppakka iliuuseqaqqullugit, aammalu kommuniminnut uteqqinnissaminnut pilerisaareqqullugit.
Hermann Berthelsenip ernumassutaa paasisinnaanngiliuk?
- Taamatut isummersortoqarnera mumisitsinermik imaluunniit sorsunnermik taarusunngilara. Oqaatigisinnaavara oqaloqatigiilluarnikkut ajornartorsiuterpassuit, aammalu nassuiaalluarnitsigut pinngitsoortinneqarsinnaapput.
Imminut qiviaritsi
- Tamanna ajornartorsiut misissorluareerutigu, imaassinnaasoq siunnersuutigisaata ilaa tapersersinnaagiga, tamanna akerlerinngilara, Evaldsen akivoq.
Atuaruk: Atassutip nuutsitsinissamut siunnersuut isornartorsiorpaa
Partiimi siulittaasup borgmesterit namminneq kommunerujussarminni siullermik iliuuseqaqquai aammalu misissueqqissaaqqullugit, atorfiit namminneq kommuniminnit illoqarfinnit sisamanit annernit nuunneqarsinnaanersut - illoqarfiit pingaarnersaat taama ilioqqullugu apereqqaannginnerminni.
Kanukoka misiliutaassaaq
Randi Vestergaard Evaldsenip ataatsimiisitaliamik imaluunnit isumalioqatigiisitamik Siumumi borgmesterit siunnersuutaannut atatillugu pilersitsiniarluni neriorsuutiginngilaa.
Kanukokap nuutsinneqarnissaat misiliutitut isigalugu taanna oqarpoq.
- Nuummi suliffeqarfik illoqarfimmut allamut nuunneqarnera qanoq innersoq takujumaarparput. Tamannalu malinnaavigissallugu pissanganartippara.
Atuaruk: Nuutsitsinissamut pilersaarutip akia suli misissorneqanngitsoq
Maanna taamatut isikkoqartillugu, atorfiit 600-t Nuummit nuunneqarnissaat piviusorsiorpalaanngilaq, taanna isumaqarpoq.
- Atorfiit nuunneqarnissaat qanoq akeqassanersoq ersarissumik misissortariaqarparput. Nunani allani akisunikuusimaqaaq. Ullumikkut taamaatsillugu sipaarniaqqissaartariaqarpugut, taamaattumillu una siunnersuut piviusorsiorpalaarnersoq eqqarsaatigisariaqarparput, aningaasaqarnermut naalakkersuisoq naggasiivoq.
Aamma takukit:
Sulisitsisut: Nuussuinermik pilersaarutit inuit 1.500-t sunnissavaat
Siumup nuutsitsinissamik siunnersuut taperserpaa
Siunnersuut: Nuummi suliffiit 600-t ukununnga nuussapput