Europap avannaani aalisarnermi atortunik saqqummersitsinerit annersaat
Kalaallit aalisarnerat nunani tamalaani soqutigineqartorujussuuvoq, taamatut nalunaartoqarpoq ukioq manna DanFiship ingerlanneqarnissaa sioqqullugu, tassanilu aamma kalaallit takutitseqataassapput. DanFishimi saqqummersitsisut nunanit 28-ineersut 400-t sinneqassapput. Tamatuminnga aaqqissuussisuuvoq ukiorpassuarni aaqqissuussisarsimasoq Aalborg Kongres- og Kultur Center.
K alaallit Nunaat kalaallillu aalisarnerat nunanit tamalaanit soqutigineqartorujussuuvoq, ukioq manna takutitsinerup DanFiship, Aalborgimi oktobarip 9-anniit 11-annut ingerlanneqarnissaa sioqqullugu taamatut isumaqarpoq tusagassaqartitsinermut pisortaq Susanne Kabel, Aalborg Kongres- og Kultur Centerimeersoq.
Aviisi Sermitsiaq taama allappoq.
Tusagassaqartitsinermut pisortap soqutiginninnermut nassuiaatigaa kalaallit aalisartut maanna nutarterinermik ingerlatsinerat.
– Kalaallit ingerlatsivii aalisariutinik nutarterinermi sallersaasimapput Niisa Trawlip kilisaatitaava Regina C siorna ukiup naalernerani tunniunneqarmat, kingornalu Qajaq Trawlip kilisaatitaava Markus tunniunneqarluni, kilisaatillu taakkua marluk umiarsualiorfimmi Vigomi sananeqarsimapput. Sisimiut, Royal Greenlandip kilisaatitaavisa umiarsuarmi tunisassiorfiusut marluk siullersaat, tunniunneqaqqammerpoq aappassaalu ukioq manna kingusinnerusukkut tunniunneqassaaq, Polar Seafoodillu kilisaatitaassaaq Spaniami sananeqaleruttorpoq, Kabel oqaluttuarpoq, taannali siusinnerusukkut ilaatigut Royal Greenlandimi paasissutissiinermut pisortaasimavoq Sermitsiamilu tusagassiortuusimalluni.
Europap avannaani takutitsinerit annersaat
DanFish, ukioq allortarlugu Aalborgimi ingerlanneqartartoq, Europap avannaani aalisarnermi atortunik takutitsinerit pingaarnersaraat, nunarsuarmilu tamarmeersunik takuniarneqartarlunilu saqqummersitseqataaffigineqartarluni. 2019-imi saqqummersitseqataaniarlutik nalunaarsimasut nunanit 28-ineersuupput (sanilliullugu 2017-imi saqqummersitsisut nunanit 23-ineersuusimapput).
Allaaserisaq tamaat aviisimi Sermitsiami atuarsinnaavat. Aviisi uani ataani pissarsiariuk: