Europami sorsunneq: Polar Seafoodip Ruslandimi tunisassiornini ingerlatiinnarpaa
Aalisakkerinermik ingerlatsivissuup Ruslandimi suliffissuani ammatiinnarallarpaa. – Tunisassiornerup unitsinnissaanik politikkikkut piumaffigineqarutta tamanna isummerfigissavarput, Polar Seafoodip siulittaasua Henrik Leth oqarpoq.
Russit naalakkersuisuisa nunat allamiut ingerlatseqatigiiffii pinngitsaalivaat piumaffigalugit Ruslandimiiginnassasut ingerlatsinertillu ingerlatiinnarlugu, imaluunniit nuna qimassagaat ingerlatatillu russinut suleqatigisaminnut tunniullugit, nunamut uteqqinnissamik tungaanut.
Aviisi Sermitsiaq taama allappoq.
Ruslandip Ukraine saassummagu Europami sorsuttoqalerpoq, Ruslandilu Kitaamiunit aningaasarsiornikkut sakkortuunik pillarneqarpoq. Tamannali manna tikillugu nunatsinni aalisakkerinermik ingerlatsivissuup Polar Seafoodip Ruslandimi tunisassiorneranut kinguneqarsimanngilaq.
– Suliffissuaatitsinni tunisassiassanik Ruslandimeersunik, Kinameersunik allanneersunillu tunisassiornerput ingerlatiinnarparput. Tassami ajortoq ajuissorlu toqqagassaapput. Ruslandimi ingerlatseqatigiiffiuterput nalilerujussuuvoq, tamakkualu igiinnarlugit tunuarutta oqarlutalu kamalluta, taamaaliorsinnaanngilagut, siulersuisut siulittaasuat Henrik Leth oqarpoq.
Qanorluunniit isiginiaraluaraanni pissutsit nunatsinni ingerlatsivimmut Polar Seafoodimut erloqinarput ajornakusoortorujussuullutillu.
– Suliffissuup 75 procentia pigaarput, russillu piginneqatitta 25 procentia pigalugu. Suleqaterput anisiinnarsinnaanngilarput. Ipitiinnarsinnaanngilarput oqarlutalu iluartuulluta. Ilisimanngilluinnarparpulli tamanna qanoq kinguneqassanersoq. Aningaasaativut annaasinnaavavut, tassa Ruslandimi nammineq aningaasaatit amerlasuut, imaluunniit annaassanngilavut. Ruslandimi pigisavut nalillit attatiinnarniarsaraavut, taanna oqarpoq.
- Sooq tassaniiginnassavisi?
– Tyskit gassimut akiliummik ullut tamaasa 500 millioner dollarsinik Ruslandimut nassiussiuartillugit Polar Seafoodimut takujuminaappoq sooq uagut aningaasarpassuit, tassa nammineq aningaasaatitigut millionerpassuit, annaanissaannut ulorianartorsiussasugut, Henrik Leth oqarpoq.
Aviisimi Sermitsiami atuarnerusinnaavutit. Aviisi uani pissarsiariuk: