Europami filmiliortartut savalimmiormioq naatsumik filmilianik mattusinerarpaat
Savalimmiuni kultureqarnermut naalakkersuisoq ukiup affaata ingerlanerani marloriarluni filmiliortartunut tapiissuteqarnissamik siunnersuutinut akerliusimavoq. Nunani tamalaani filmiliortartut isumaqarput, naalakkersuisoq mattussisimasoq.
Kultureqarnermut naalakkersuisoq Jenis av, eqqumiitsuliortut kiffaanngissuseqarnerannik ataqqinnittariaqarnerarlugu Rana Federation of European Screen Directorsimit januaarimi saaffigineqarsimavoq.
Saaffiginnissimanermit ukiup affaa qaangiutiinnartoq kattuffik taanna, filmiliortartunik mattussinerit unitseqqullugit oqartussanut allagaqaqqissimavoq. Tamatumuuna kattuffiit „Freemuse“, „Film.GL-Greenland Film Makers“, „Dansk Kunstnerråd“ aamma „Danske Film Instruktører“ allakkamut atsioqataasimallutik.
- Ajornartorsiut tamanna siorna, Jenis av Rana filmiliamut Skúla Scam-imut decembarip qaammataani tapiissuteqarusunngimmat saqqummiupparput, tupaallaatigaarpullu taamatut pisoqaqqinnera, eqqumiitsuliortut kiffaanngissuseqarnerannut tamanna akornusiiniarnerummat. Pingaartumik naalakkersuisup torersumik pissuseqarnissamik nammineq paasinninnini tunngavigalugu itigartitsisimanera eqqarsaatigalugu, naalakkersuisumut allakkami allassimavoq.
Atoqatigiittoqarpallaarlunilu oqaasipiluttoqarpallaartoq
Siorna decembarip qaammataani saqqummiunneqarpoq, Jenis av Ranap, partiimut upperisarsiortuusumut ilaasortaasoq, filmiliamut ”Skúla Scam”-imut tapiissuteqarnissamik siunnersuisoqarnernut akerliusimasoq”.
Tóki Jansson 17-inik ukiulik filmiliortuullunilu 40.000 koruuninillu tapiiffigineqarnissamik qinnuteqartuusimavoq. Siunnersuisartut marluk filmip tapiiffigineqarnissaa inassutigisimavaat, naalakkersuisulli siunnersuineq malinniarnagu aalajangersimavaa. Oqaasipiluttoqarpallaartoq tunngavilersuutigisimavaa aamma oqaatsinik atuineq naammagisimannginnerarlugu.
Maajip qaammataani Katrin Joensen-Næsip naatsumik filmiliaa ”Sæla”, atoqateqarnissamik pinngitsuuisinnaannginnermut tunngassuteqartoq ”Skúla Scam”-itut pineqarpoq. Takutitassiat ilaat sakkortuallaartut, naalakkersuisoq isumaqarpoq.
Jenis av Ranap Kringvarp Føroyamut oqaatigisimavaa, filmit assuarnartut tapiiffigineqassanngitstu. Oqaatigaa mattussisoqanngitsoq.
- Inatsisitigut pisinnaatitaaffigineqartut ilaannut politikkikkut oqartussat akulerullutik naaggaaraagata mattussisoqartarpoq. Massakkut taamaattoqanngilaq. Pisumi matumani naalakkersuisoq tassaavoq inaarutaasumik aalajangiisinnaatitaasoq, Jenis av Rana oqarpoq.
Lagmandi akulerunnianngitsoq
Inatsisit malillugit Jenis av Rana siunnersuummut akulerussinnaatitaallunilu akerliusinnaatitaavoq. Taamaakkaluartoq tamanna Savalimmiuni oqallisigineqalersimaqaaq. Filmiliortartut lagtingimilu illuatungiliuttut amerlanersaasa naalakkersuisoq mattussinerarpaat. Oqaatigaallu inatsit allanngortinneqartariaqartoq, eqqumiitsuliortunut filmiliortunullu tapiissuteqarnissamut naalakkersuisut ataasiakkaat namminneq isumaat apeqqutaasassanngippat.
Tjóðveldi sinnerlugu lagtingimi ilaasortap Bjørt Samuelsenip apeqquteqaatit tunngavigalugit oqallinnermi pisoq lagmandimut saqqummiussimavaa. Lagmandili Bárður á Steig Nielsen suliamut akuliukkusussimanngilaq.
Bárður á Steig Nielsen oqarpoq, inatsit malillugu aalajangiisoqarsimanngikkaangat imaluunniit aalajangiineq politikkikkut attanneqarsinnaanngikkaangat aatsaat akuliuttarluni.