EU: Kalaallit Nunaata miliuunissai pillugit isumaqatiginninniarnerit aallartissinnaanngorput
EU-mi naalakkersuisut EU-p pingaarnertut missingersuutissai akuerisimavaat, missingersuummilu immikkuualuttut ataasiakkaat isumaqatiginninniutigalugit aallartittoqarsinnaanngorluni. Isumaqatiginninniutissani 225 millioner euro Kalaallit Nunaannut atugassatut immikkoortinneqarsimapput.
EU-mi naalagaaffiit naalakkersuisullu EU-mi missingersuutit annertussusissaat pillugit ullorpassuarni isumaqatiginninniareerlutik, sapaatip akunnerani matumani isumaqatigiissuteqarput.
Missingersuutit 2021-miit 2027-imut atuutissapput, tamannalu Kalaallit Nunaannut pingaaruteqarput, Kalaallit Nunaat pingaartumik ilinniartitaanermut atugassanik EU-mit 220 millioner koruunit missaannik pissarsisarami.
Aamma missinngersuutinit pineqartunit taakkunannga aalisarnermi suleqatigiinneq akilerneqartarpoq, tamannalumi EU-p Kalaallillu Nunaata aalisarnikkut suleqatigiinnissamik isumaqatigiissutissaannut attuumassuteqarpoq.
Missingersuutit annertussusissaat inissinneqareeraluartoq, aningaasat sumorpiaq atorneqassanersut taamalu aningaasat qanoq annertutigisut EU-p Kalaallit Nunaannik suleqateqarneranut atorneqassanersut suli isumaqatigiissutigineqanngillat.
225 mio. eurot tunniunneqarsinnaasut
Kalaallit Nunaata EU-mut Sinniisoqarfiani pisortaq Mininnguaq Kleist oqaluttuarpoq:
- Oqaatigineqarsinnaavoq aningaasat annertussusissaat isumaqatigiissutigineqartoq. Maannali immikkuualuttunut ataasiakkaanut aningaasat qanoq annertutigisut atoneqassanersut suli isumaqatigiissutigineqanngillat, Mininnguaq Kleist nassuiaavoq.
Sinniisoqarfimmi pisortaq naapertorlugu, Kalaallit Nunaata ullumikkut pisartagaasa annertoqqataannik Kalaallit Nunaat suli pissarsisassaaq:
- Missingersuutissatut siunnersuummi matumani 2021-miit 2027-mut Kalaallit Nunaannik suleqateqarnissamut 225 millioner eurot immikkoortinneqarsimapput. Taakku koruuninngorlugit 1,68 milliardit missaannik annertussuseqarput, aningaasallu naleerukkiartortarnera eqqarsaatigissagaanni ullumikkut pisartakkanit annertunerulaarput, siusinnerusumili pisartakkanik annikinnerullutik, Mininnguaq Kleist oqarpoq.
Isumaqatiginninniarnerit ukiup sinnera tamakkerlugu ingerlanneqarsinnaasut
Annikinnerusumik tapiissuteqartoqarnerani, EU tapiissuteqartarnissamik aaqqissuussisimavoq, Kalaallit Nunaata siusinnerusukkut qinnuteqarfigisinnaanngisaanik
Tamatuma saniatigut EU-p Kalaallillu Nunaata aalisarnermi suleqatigiinnissaq pillugu isumaqatiginninniarnerat suli nammassineqanngillaq.
Sinniisoqarfimmi pisortap nassuiaatigaa, EU-mi tyskit siulittaasuusut missingersuutit pillugit ukiamut isumaqatiginninniarnissaq pilersaarusiussagaat:
- Tunngaviatigut isumaqatiginninniarnerit ukiup naanissaanut ingerlanneqarsinnaapput, Mininnguaq Keist oqarpoq.