isumaqatigiissuteqarneq

EU-p Savalimmiut saammaappaa

Naatsorsuutigineqarpoq EU-p Savalimmiuni niuernikkut pillaataa aggustip 15-ianni atorunnaarsinneqassasoq, naalakkersuisut siulittaasuat Kaj Leo Johannesen tusagassiorfinnut nalunaarutikkut allappoq

Kaj Leo Johannesen: EU-p pillaatai aggustimi atorunnaarsinneqassapput

Savalimmiuni naalakkersuisut siulittaasuannut aalisarnermullu naalakkersuisumut allakkatigut EU-kommissionip uppernarsarpaa EU-p Savalimmiunut niuernikkut pillaatai atorunnaarsinneqassasut.
Isumaqatigiissutip ilagaa savalimmiuni naalakkersuisut EU-mut eqqartuussisukkoortitsineri marluk, FN-ip imaanut oqartussaanermut eqqartuussiviani aamma WTO-p eqqartuussiviani, unitsinneqarallassasut tunuartinneqavissallutillu niuernikkut pillaatigisat atorunnaarsinneqarpata, Kaj Leo Johannesen paasissutissiivoq.
Savalimmiuni aalisarnermut ministeri Jacob Vestergaard neriorsuisimavoq, aalisarnermut kommissærip Maria Damanakip ammassassuarenik nungusaataasumik aalisernermik taasaa, unitsinneqassasoq.
Siunissami savalimmiunit aalajangersimasumik pisassiisoqartassanngilaq, savalimmiulli isumaqatigiinniartuisa EU-mik isumaqatigiissuteqarniarlutik pisassatik annertuumik ikilisariaqarsimavaat.
Naalakkersuisut siuilttaasuat EU-llu aalisarnermut kommissæria Maria Damanaki Norge-p Islandillu naammaginngeqisaannik atlantikup avannata kanginia ammassassuartassanik isumaqatigiinniuteqarsimapput. Jacob Vestergaard oqarpoq Savalimmiut pisassaat siornamit ikinnerungaatsiassasut, taamanikkut pisassanit tamarmiusunit 17 procentiusimalluni, taamaakkaluartorli pisassatoqqanit 5 procentinit amerlanerungaatsiarlutik. Savalimmiuni aalisartut maanna pisassat tamarmiusut 10 procentiisa missarpiaat pisarisinnaalerpaa.
Norgep Islandillu aalisarnermut ministeriisa ´tupigusuutigaat´ EU savalimmiunut pisassiimmat nunat allat pingasut isumasioqqaarnagit. EUp, Savalimmiut, Norgep, Islandip Ruslandillu isumaqatigiissutigisimagaluarpaat ammassassuartassanik agguaassineq ingerlanneqassasoq misissuineq, septembarip aallaqqaataata missaani naammassineqartussatut naatsorsuutigineqartoq, tunngavigalugu, taamatut allappoq Fiskeritidende.

Powered by Labrador CMS