EU-mut aalisarnikkut aaqqiagiinngissuteqarneq sakkortusiartortoq
– Kalaallit Nunaat EU-mut taarsiullugu Tuluit Nunaannut, Ruslandimut Kinamullu killeqanngitsumik niueqatigiinnissaq pillugu isumaqatigiissuteqaruni pitsaanerujussuarmik inissisimassagaluarpoq, Henrik Leth naliliivoq.
EU-mut aalisarneq pillugu isumaqatigiinniarnerit ajalusoornerisa kingorna Kalaallit Nunaata EU-mi niuerfinnut akileraaruteqanngitsumik nioqquteqarsinnaanera ulorianartorsiortinneqalerpoq, Kalaallit Nunaannit isumaqatigiinniartitanut peqataasoq, Henrik Leth, oqarpoq. Taassuma EU ”suleqatitut pimoorussinngitsutut” aviisimut Sermitsiamut oqaatigaa.
Kalaallit Nunaata EU-llu akornanni aalisarneq pillugu isumaqatigiissutissamik aaqqiagiinngissuteqarneq suli qaangerneqanngilaq. Isumaqatigiinniarnerit juulimi ajalusoorput. Kisianni piffissamut 2021-mit 2026-mut ukiortaartinnagu aalisarneq pillugu isumaqatigiissuteqartoqanngippat illuatungeriit marluullutik inooqataaffigisinnaasaannik, taava Kalaallit Nunaata aalisakkanik tunisassianik akileraarutitaqanngitsunik EU-mut eqqussisinnaanini annaassavaa.
Kalaallit Nunaanni isumaqatigiinniartitanut peqataasut ilaat, Henrik Leth, taama isumaqarpoq.
– Isumaqatigiinniarnerit isumalluanarpallaanngillat. Aalisarneq pillugu isumaqatigiissutissaq iluatsinngitsuussappat, EU-mut nioqqutissanik akileraarutitaqanngitsunik eqqussisinnaanerput annaassavarput, Henrik Leth oqarpoq.
Isumaqatiginninniarnerit ajalusoorput
Taanna Sulisitsisunut aamma ingerlatseqatigiiffimmut Polar Seafood A/S-imut siulittaasuuvoq.
Kalaallit Nunaata EU-llu akornanni piffissamut 2021-mit 2026-mut aalisarneq pillugu isumaqatigiissutissamik qaammatini arfinilinni isumaqatigiinniarnerit ukioq manna juulimi ajalusoorput. Maannali isumaqatigiissutip nutaap inissinneqarnissaanut qaammatit marluk affarlu sinnerussimaneranni aaqqiissuteqartoqarnissaanik ilimanaateqartoqanngilaq.
Henrik Leth isumaqatigiinniarnerit pillugit oqarpoq, assingusumik misigisaqanngisaannarsimalluni.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq:
EU-Kommissioni ukioq manna Kalaallit Nunaannut isumaqatigiinniarnerni Bruxellesimi ingerlanneqartuni, 2021-mit 2026-mut isumaqatigiissutissap ajalusoorutigineqarneranik kinguneqartuni, ullumikkut aalisarneq pillugu isumaqatigiissummut sanilliullugu pisassiissutinik amerlanerusunik Kalaallit Nunaannullu atugassarititaasunik nalinginnaasumik ajorseriaateqarsimasunik, piumasaqarsimavoq.
Kalaallit Nunaannit isumaqatigiinniartitat isumaqatigiinniarnerit unitsippaat Kalaallit Nunaata isumaqatigiinniarnerit ingerlateqqinnissaat pimoorussiviunngitsutut nalilermagit.