EU-mi kukkuluttorneq inuunernik naleqarsimasinnaagaluartoq
EU-mi suliffeqarfiit isarussanik illersuutinik qanermulluunniit assiaqatinik nunanut EU-p avataaniittunut annissuissagunik akuersissummik peqartariaqarput. Malittarisassaq Kalaallit Nunaannut Savalimmiunullu aamma atuuppoq, aqaguli allanngortinneqassalluni.
EU peqqussummik 15. marts atuutsitsilerpoq, suliffeqarfiit napparsimmaveqarfimmi atugassanik illersuutinik EU-mit annissuissagunik oqartussanit akuersissuteqaqqaartalernissaat peqqussutinngortillugu.
Peqqussutip atulersinneratigut nunat EU-mut ilaasortaasut kiinnanut assiaqutinik, isarussanik illersuutinik, atisanillu atasunik illersuutinik pissaqartuaannarnissaat qulakkeerniarneqarpoq.
Kalaallit Nunaannut Savalimmiunullu atortunik nassiussisoqassatillugu peqqussut aamma atorpoq.
- Peqqussutip atulersinneratigut EU-p iluani niueqatigiinneq naalagaaffiillu illersorneqarnerusutut misiginissaat anguniarneqarpoq. Aalajangeereernerup kingorna apeqquserneqarsimavoq europami nunat aningaasaqarnikkut suleqataasut, soorlu Norge, peqqussummi ilaatinneqassanersut. Danmarkillu Kalaallit Nunaat Savalimmiullu peqqussummit peerneqarnissaat, taamatullu atortunik ajornannginnerusumik nassiffigisarsinnaanerat, qinnutigisimavaa, Mininnguaq Kleist, Bruxelles Kalaallit Nunaata sinniisoqarfianeersoq oqaluttuarpoq.
Immikkut ittumik ilaajunnaarneq 21. marts atulissaaq
Sinniisoqarfimmi pisortap sisamanngornermi ilisimatitsissutigaa peqqussummut immikkut ittumik ilaajunnaarsitsineq sulissutigineqartoq:
- Ilisimatitsissutigisinnaavara Bruxellesimi suleqatikka attaveqarfigereerlugit, Europami Ataatsimiititaliarsuarmiit oqariartuutigineqarpoq avammut niuernermut tunngatillugu peqqussut piffissami qaninnermi aaqqinneqassaaq, ersarissarneqassalluni Kalaallit Nunaat, Savalimmiut europamilu nunat aningaasaqarnikkut suleqatigisat piumasaqaammi ilanngunneqassanngitsut, Mininnguaq Kleist Sermitsiaq.AG-mut allakkatigut sisamanngornermi ilisimatitsivoq.
EU-mi Ataatsimiititaliarsuaq tallimanngornermi tusagassiutinut nalunaaruteqarpoq nunat arlallit – Savalimmiut Kalaallit Nunaallu ilanngullugit – avammut niuernermi killilersuinermit peqataatinneqassanngitsut.
Killilersuinermut peqataatitsiunnaarneq aqagu 21. marts atuutilissasoq, ataatsimiititaliarsuaq allappoq.
Chemnitz Larsen: Danmarkimut kinaannguusaarnartoq
Folketingimi politikeri Aaja Chemnitz Larsen (IA) avammut niuernissamut killilersuilernermi Danmarkip Kalaallit Nunaat Savalimmiullu ersittumik puigorsimammagit pikkuginngilluinnarpaa:
- Danskit naalakkersuisuinut tamanna kiinaannguusaarnartuuvoq, tassa EU-mi peqqussutip suliarinerani Kalaallit Nunaat Savalimmiullu puigorluinnarsimammagit. Ajuusaarnarpoq, suliat allat pisariaqarnerit unikaallatsillugit, aaqqiiniapallattariaqalermata, Sermitsiaq.AG-mut oqarpoq.
Bruxellesimi sinniisoqarfimmi pisortaq naapertorlugu Kalaallit Nunaat avammut niuernermut killilersuuteqarnermut ilaatinneqarnissaa pisussaasimanngikkaluarpoq:
- EU-mi nunat akornanni niuernermi nunat killiini akornutit tikinneqarsimasut pinngitsoortinniarlugit peqqussutiliornermi sulisoqarpoq. Suliaq piaarnerpaamik suliatut ingerlanneqarpoq, eqqarsaataasimanngilaq europap iluani nunat aningaasaqarnikkut suleqatigineqartut, Kalaallit Nunaat imaluunniit Savalimmiut peqqussummik eqqornerlunneqarnissaat, Mininnguaq Kleist oqarpoq.
Sermitsiaq.AG-p Peqqinnissaqarfimmi aqutsisut aperisimavai avammut niuernerup killilersorneqarnera Kalaallit Nunaannut napparsimmaveqarfimmi illersuutitut atugassanik tikiussinissamut kinguneqarsimanersoq, akissutinilli suli nassiussinngillat.