EU aalisarneq pillugu pingaarutilimmik isumaqatigiissuteqarfigineqartoq
EU-mi aalisariutinut aalisagartassiissutit annikillisinneqarput Kalaallillu Nunaat aningaasanik amerlanerusunik pissarsisussanngorluni. Kalaallit Nunaata EU-llu piffissami sivisuumi isumaqatiginninniarneranni tamanna inerniliunneqarpoq.
Kalaallit Nunaat 2021-mi 2022-milu ukiumut 140 millioner koruunit missaannik pissarsisassaaq, tamatumalu kingorna pissarsiassai amerleriaqqittassallutik, Namminersorlutik Oqartussat tusagassiorfinnut nalunaarutaanni tamanna atuarneqarsinnaavoq.
EU-mut saarullittassiissutit qaffaaffigineqartut
Ataatsimut akiliutigineqartussat tassaapput aalisagartassanut EU-mut pisarisassanngortinneqartunut akiliutitut, EU-mi aalisariutaatillit akuersissuteqarfigineqartut akiliutaat kiisalu aalisarnermik ineriartortitsinissamut tapiissutit.
Aalissakkanit assigiinngitsunit arfineq-pingasuusunit EU-mut saarullittassiissutigineqartut kisimik 1,800 tonsiniit 1.950 tonsinut amerlineqarput. EU-mi aalisartut Kalaallit Nunaata imartaani aalisarnissaannut aalisakkat allat pisassiissutigineqartut ikilisinneqarput.
- Aalisarnermi peqatigiinnissamik nutaamik isumaqatigiissuteqarnikkut Kalaallit Nunaata EU-llu akornanni pitsaasumik peqatigiinnerup siunissaq eqqarsaatigalugu ingerlaannarnissaa qulakkeerneqarpoq, aalisarnermillu peqatigiinnissamik isumaqatigiissutip saniatigut Kalaallit Nunaat pillugu isumaqatigiissummik Kalaallit Nunaatalu aalajangerneranik imaqarpoq. EU-mik aalisarnermi peqatigiinnissamik isumaqatigiissummi pisassat annikilliseqqinnerisigut Kalaallit Nunaanni aalisarnerup siunissami pitsaasumik ineriartorteqqinnissaa ilaatigut qulakkeerneqarpoq, Aalisarnermut, Piniarnermut Nunalerinermullu Naalakkersuisoq Jens Immanuelsen oqarpoq.
Isumaqatiginninniaqataasimasut
2020-mi januaarip qaammataanili EU isumaqatiginninniarfigineqalerpoq, tssaani Aalisarnermut Naalakkersuisoqarfik aqutsisuulluni, Kalaallit Nunaanni Aalisarsinnaanermut Akuersissutinik Nakkutilliisoqarfimmit, Aningaasaqarnermut Naalakkersuisoqarfimmit, Nunanut Allanut Naalakkersuisoqarfimmit, Pinngortitaleriffimmit kiisalu Kalaallit Nunaanni aalisarnermik inuussutissarsiuteqartut sinniisuinit soorlu KNAPK-imit aamma Sulisitsisunit taperserneqarluni.
Isumaqatigiinniarnermi angusat tassalu aalisarnermi peqatigiinnissamut isumaqatigiissutissaq tassungalu tapiliussat atuutsilersinneqartinnagit Naalakkersuisunit EU-millu inaarutaasumik akuerineqaqqaartussaapput.