video takuuk
Etnisk Grand Prix-mi kalaallit peqataasut aappaattut inissittut
Danmarkimi Melodi Grand Prixertoqannginnerani erinarsornermik unammititsinermi kalaallit peqataasut, Ivalu Judithelu, aappaattut inissipput
Inuiaat erinarsornermik unammitinneqarnerat Etnisk Grand Prix arfininngormat ingerlanneqarmat kalaallit peqataasut, Ivalu Judithelu, nuannarineqarluarput.
35-nik ukiulik Judithe Jørgensen Qasigiannguaneersoq aamma 27-nik ukioqartoq Paamiuneersoq Ivalu Josefsen Aalborgimi najugaqartuupput. 'In a Moment Like This' erinarsorpaat, tuluttut kalaallisullu akusarlugu erinarsorlugu.
Inuiaat qulingiluat
Etniske Melodi Grand Priximi peqataasuni 22-iusut akornanni inuiaat assigiinngitsut qulingiluat peqataapput. Tassani danskit Melodi Grand Priximi siornatigut erinarsugaat atorlugit.
Taakkunannga qulit ingerlaqqipput, tassani Ivalu Judithelu peqataapput. Melodi Grand Priximi ukioq kingulleq ajugaasoq, Basim, naliliisut pingasuusut ilagaat. Naliliisut aalajangerpaat tallimat ajugaaniutivinnissamut ingerlaqqissasut Ivalu Judithelu aamma tassani peqataapput. Europahallenimi unammisitsinermi ingerlanneqartumi kalaalerpassuit peqataapput.
Tassanngaannit ajugaasut toqqarneqarput. Tassani naliliisut Sharif toqqarpaat, taanna kurdistanermiut tyrkerinillu siuaaqarpoq. 'Smuk som et stjerneskud' atorpaa.
Etniske Melodi Grand Prix ingerlanneqartalissasoq aalajangiunneqarpoq. Taanna Melodi Grand Prixeqannginnerani ingerlanneqartalissaaq. Melodi Grand Prix Aalborgimi Gigantiumimi februaap arfineq aappaanni ingerlanneqassaaq.
Ivalu Judithelu erinarsornerat videokkut qulaani takuuk