Etiopiami miniseriuneq nunamik sanilerisaminik eqqisseqateqarnermini, Nobelip nersornaasiuttagaanik nersornaaserneqartoq

Etiopiami ministeriuneq Abiy Ahmed, Etiopiap ukiorpassuarni akerarisimasaanik Eritreamik eqqisseqateqarnini pissutigalugu Nobel eqqissinermut nersornaasiuttagaa nik 2019-imi tunineqarpoq.

Abiy Ahmed nersornaatisisussatut piukkunneqartunut ilaareerpoq.

Svenskeq silap pissusaanut tunngatillugu sorsuuteqartoq Greta Thunberg, piukkunneqartunut aamma ilaasoq saneqqutiinnarlugu nersornaaserneqarpoq.

43-nik ukiulik Abiy Ahmed nersornaaserneqarpoq, "eqqissisitsinissa anguniarlugu nunallu tamalaat suleqatigiinnissaat anguniarlugu suliniuteqarnini, minnerunngitsumillu nunamik sanilerisaminik Eritreamik aaqqiagiinngissuteqarneq iluarsiiffiginiarlugu aalajangiisuusumik suliaqarsimanini pissutigalugu", komité aalajangiisuusoq oqarpoq.

Eritreap illoqarfittut pingaarnersaani, Asamarami, 2018-imi juulip qulingiluaani Aiby Ahmed aamma Eritreami præsidenti Isaias Afwerki aatsaavissuaq ataatsimeeqatigeereerlutik nunat taakku marluk akunnerminni aaqqiagiinngissuteqarneq pisortatigoortumik atorunnaarsippaat.

Eqqisseqatigiinnissamik isumaqatigiissut ukioq taanna kingusinnerusukkut atsiorneqarpoq.

Aaqqiagiinngissutaasoq 1998-imiit 2000-imut killeqarfimmut tunngatillugu aporaassimanermit aallaaveqarpoq.

Eqqisseqatigiinnissamik isumaqatigiittoqarmat nunani pineqartuni ambassaseqarfiit ammaqqinneqarsimapput.

Ilisimatuussutsikkut Nobelip nersornaasiuttagaa Sverigemi tunniunneqartartoq, eqqissinermut nersornaasiuttagaq Norgemi tunniunneqartarpoq. Komitémit Norgemi inatsisartunit, Stortinget, pilersinneqarsimasumit nersornaat tunniunneqartarpoq.

Komitémit neriuutigineqarpoq, nersornaat ministeriunerup sumiiffimmi eqqissisoqarnissaanik suliniuteqarneraut nukittorsaaqataassasoq.

Abiy Ahmedip allaffianit oqaatigineqarpoq, "inuiaqatigiittut tulluussimaarpugut".

Ahmed 2018-imi apriilip qaammataani ministeriuninngorpoq. Ministeriuninngorami ingerlaannaq nalunaarutigaa, Eritreamik eqqisseqateqarnissap pillugu oqaloqatigiinneq ingerlateqqinniarlugu.

Komitémit erseqqissaatigineqarpoq, Etiopiami ministeriuneq kisimi eqqisseqatigiinnissamut qulakkeerinnissimanngitsoq.

- Ministeriunerup Abiyp assani isaammagu præsidentip Afwerkip tiguaa, taamalu nunat taakku eqqisseqatigiinnissaanut peqataalluni, komité Abiy Ahmedimik toqqaasimasoq allappoq.

- Norgemi Nobelkomitep, Abiy Ahmed siorna ukiup ingerlanerani 2019-imi Nobelip eqqissinermut nersornaasiuttagaanik pissarsinissamut iliuuseqarnerpaasimasutut isigivaat.

Nersornaat decembarip qaammataani tunniunneqassaaq. 2019-imi nersornaaserneqanissamut piukkunneqartut 301-iusiapput. Taakkunannga inui 223-upput suliniaqatigiiffiilu 78-iullutik.