sipaarniarneq
Eskimologip matuneqarnera ilinniagaqartut tupassutigeqaat
Eskimologi-mik ilinniagaqarfiup ilinniagaqartunik nutaanik tiguseqqinnginnissamik aalajangernera København Universitetimi Studier på Eskimologi og Arktiske Studier-imi ilinniagaqartut nakeriallaatigeqaat
Tallimanngormat ualikkut Københavns Universiteti sulisunut ilinniagaqartunullu allakkanik nassiussivoq, oqaluttuullugit Det Humanistiske Fakultet-imi faginut ilinniartukinnernut 13-inut ilinniagaqartunik nutdaanik tigusinissat 2016-imi unitsinneqartut, 100 millioner koruuninik sipaaruteqarnissaq pissutigalugu.
Sermitsiaq.AG-p Ortu Mørch Olsen, Eskilomogi og Arktiske Studier-imi barchelor-inngorniartoq, arfininngormat oqaloqatigaa.
Humanistiske Fakultet-ip aalajangernera qanoq isumaqarfigaajuk?
– Sipaarniuteqarnissamik paasitinneqaratta ulloq taanna nakeriallannaqaaq. Ukiumi ataatsimi faginik ilinniagaqarfinnut arlalissuarnut tigooraajunnaarneq sualoqaaq. Allaanngilaq pujorsuup ataaniilluni. Nutarsiassaq isummerfigissallugu tutsilluaqqaarniagassaavoq.
– Fagi ilinniagaqarfipput Kalaallit Nunaanni ilisimatusarnermut pingaaruteqarsimaqaaq, ilinniatrfimmilu tassani ilinniagaqartut akulerutsinneqartarsimapput ilisimasalittullu soraarummeersinneqartarsimallutik, Kalaallit Nunaanni inuiaqatigiinnut pingaaruteqarluartartunik. Ilinniagaqartullu ilarpassui aamma kalaaliupput. Takorloorsinnaanngilluinnarpara ukioq manna Eskimologi & Arktiske Studier-imut qinnuteqarniarlutik eqqarsarsimasut qanoq pakatsitigissanersut.
Ilinniagaqarfik faginit 13-init pineqartunit, faginik allanik sipaarniuteqarsinnaagaluarpa?
– Det Humanistiske Fakultet-imi dekani allappoq sipaarniutissat 100 millioner koruunit allami nassaarineqarsinnaanngitsut. Isumaqarpunga tamatumunnga pissutaasoq naalakkersuisut ilinniarnertuunngorniarfinnik nungusaaniarnerat, tamatumalu kinguneraa ukioq manna faginut ilinniartukinnernut tiguseqqissinnaannginneq.
Universitetimi 100 millioner koruuninik sipaaruteqartoqarnissaanik naalakkersuisut aalajangernat qanoq isumaqarfigaajuk?
– Politikkimi isumaqatigiinnginneq ajornanngilaq, ilinniagaqarfimmili maani ulloq nuanninngitsuuvoq. Nutaarsiassaq soraarummiileruttornermi takkuppoq. Maannakkorpiaq studenterråditta qisuariarnissaa utaqqivara. Immaqa akerliussutsimik takutitsinernik kinguneqassaaq, naluara. Nuannersumik tusagaqarnissaq neriuutigiinnagassaavoq, ilinniagaqarfigami una nuannareqaara.
Paasisinnaaviuk fagi Eskimologi, ilaannit sipaaruteqarfiusariaqartutut sooq isigineqarnerunersoq, faginit amerlanerusunik qinnuteqarfigineqartarninngarnit inuussutissarsiornermullu samminerusuninngarnit?
– Fagi sammisarput paatsoorneqakulasarpoq. Fagi annertoorujussuuvoq assigiinngitsunik sammisassaqartorujussuulluni, fagilu Eskimologi ineruiartortuaannavissimavoq, ukiut 100-ngajaat matuma siornatigut pilersinneqarmalli.
Tassa fagip atorunnaarsinniarneranut pissutituaavoq fagit mikisut faginut angineriusunut pilliutiginissaat. Tamanna nungusaaniarnerulluinnarpoq, Ortu Mørch Olsen Sermitsiaq.AG-mut oqarpoq.