Naqinnernik ilisarinnissinnaannginneq, ADHD, isumatsassimangaarneq autismelu. Tamakkuupput ersinngitsumik innarluutit ilaat.

Nunatsinni inuit innarluutillit kattuffia, NIIK aamma Tilioq, inuit innarluutaat imaaliallaannaq takuneqarsinnaanngitsut pillugit paasititsiniutinik suliaqarniarlutik suleqatigiilerput.

Tilioq tusagassiorfinnut taama nalunaaruteqarpoq.

NIIK-imi siulittaasoq Anders Meilangip erseqqissarpaa inuit innarluutillit allatuulli inuuneqarnissaat pingaaruteqartoq.

Paasititsiniutinik videonik suliaqarnermi,  NIIK-ip Tiliullu takutikkusuppaat, inuit innarluutillit assigiinngitsigineratulli ersinngitsumik innarluutit aamma amerlatigisut.

- NIIK-imiit neriuutigaarput uani suliniummi inuit innarluutillit qitiusumik inuiaqatigiinni pingaartinneqalerumaartut. Aammali neriuutigaarput inuit innarluutillit allat inuunertik aamma anguniakkatik pillugit sassarlutik oqaluttuarsinnalernissaannut uku paasisitsiniutissat kaammattuutigissagaat, Anders Meilvang oqarpoq.

Paasititsiniutit videot sapaatip akunnera 41-p tungaanut ingerlassapput.

- Inuiaqatigiit inuit innarluutillit assigiinngiiaaqisut pillugit annerusumik paasissutissiiffigisarneratigut inuit pigiliutiinnakkamik isiginnittariaasiat allanngortissavarput. Tiliumit misissuinitsinni nutaanerpaami paasivarput inuiaqatigiinni inuit ersinngitsunik innarluutillit suli pitsaanerusumik pissuseqarfigisariaqarivut, inuit innarluutillit illersuisuat Christina Johnsen oqarpoq.

- Imatut paasisitsiniaalluni suliniuteqarneq pingaaruteqartorujussuuvoq, tassami inuit ersinngitsunik innarluutillit qanoq pissuseqarfigineqartarusunnerlutik kiisalu qanoq paasineqartarusunnerlutik namminneq oqariartuuteqarfigissavaat, naggasiivoq.