Ernummateqarneq: Utoqqaat illuani najugallit siniffimmi quisartut
Inatsiartut ombudsmandiata utoqqaat illuani Luuvikasimmi Narsamiittumi pissutsit ernumanartoqartippai. Najugallit perususersartarfiliarnissamut nangiminnilluunniit taarsiinissamut tamatigut ikiorneqarneq ajorput.
Narsami utoqqaat illuanni Luuvikasimmi najugallit perusuersartarfiliarniaraangata nangiminnillu taarsiiniaraangata ikiorneqarnissaat piffissaqarfigineqarneq ajorpoq. Inatsisartut Ombudsmandeqarfianit nakkutilliiartortut ukioq manna apriilip qaammataani nakkutilliinerannit tamanna takuneqarsinnaavoq.
- Sulisoq assersuutigalugu oqaluttuarpoq najugaqartoq siniffimmini qanittukkut quisoorsimasoq, perusuersartarfiliarnissaminut sulisunit piffissaqarfigineqannginnami. Sulisup allap nassuiaatitut oqaatigaa najugaqartut pisuni taamaattuni sulisut ikiuinissaminnut piffissaqarfiginngisaanni natermi aamma quisoorsinnaasartut, naqqullu tamatuma kingornatigut asanneqarnissaa aamma ilaanni piffissaqarfigineqanngitsoortartoq, ombudsmandi tusagassiorfinnut nalunaaruteqarnermini allappoq.
Kommune Kujalleq nalunaarusiap missingiutaanut oqaaseqaateqarnermini allappoq, 'Kommuni isumaqarpoq ajornartorsiut tamanna sulisunut pissutissaqaratik sulinngitsoortartunut qularnaatsumik tutsinneqarsinnaasoq.'
Nangernik amigaateqarneq sumiginnaaneruvoq annertooq
Najugaqartulli perusuersartarfiliarnissamut ikiorneqarniarnerat kisimi ajornartorsiutaanngilaq: Piffissani marlunni nangit angisuut amigaatigineqarsimapput, tamamuma kinguneranik najugaqartut nanginik mikivallaanik nangilerneqartarsimapput imaluunniit nangilerneqarneq ajorsimapput. Pisunilu taakkunani utoqqaat siniffimmi quisarsimapput.
- Ombudsmandi nalunaarusiami tamanna tunngavigalugu allappoq utoqqarnik paaqqinniffik Luuvikasittut ittoq najugaqartunut pisariaqarluinnartunik, soorlu nanginik, piffissat ilaanni neqerooruteqarsinnaanngippat tassani ilungersunartumik sumiginnaaneq aamma najugaqartunik ataqqinninngitsumik pinninneq pineqartoq, ombudsmandi Vera Leth nalunaarusiamini allappoq.
Pisortaqatigiit nassuiaatitut oqaatigaat, Luuvikasiup ilaatigut misigisimagaa najugaqartunut nanginik pisinissamut ”itigartinneqaqattaarsimalluni”, Kommuni Kujallermi ingerlatsiviup paaqqinniffiup pisiassanik akikinnerusunik pissarsiniartariaqarnera tamatigut innersuussutigisarsimammagu. Nioqqutissat taamaattut eqqarsaatigalugit inniminnerneqarneranniit tiguneqarnerannut sapaatit akunneri arfinillit tikillugit ingerlasinnaasarmata tamanna Luuvikasiup najugaqartunut nanginik ikinnerpaamik marloriarluni amigaateqalerneranik kinguneqarsimavoq.
Kommuni nalunaarusiami missingersuummut oqaaseqaateqarnemini allappoq, 'missingersuutinik nakkutilliineq eqqarsaatigalugu' kommuni “paaqqinniffiit pisiassaasa akuerineqartarnerannik qitiusumik aqutsisoq”. Nanginilli amigaateqarsimanerit suliniutinik taakkuninnga pissuteqarnersut kommunip erseqqissumik oqaatigisinnaanngilaa.
Kommunip naammaatunik sulisoqarnissaq isumagisinnaanngikkaa
Ombudsmandi isumaqarpoq, perusuersartarfiliarnissamut ikiorneqartarnissaq pineqartillugu, utoqqaat illuat tamatigut naammattunik sulisoqartariaqartoq.
- Taamaammat matumani nalunaarusiaagallartumi allappunga, Luuvikasimmut innersuussutiginiarlugu ingerlaavartumik illersorneqarsinnaasumik aalajangersimasunik sulisoqartarnissaq qulakkeerneqassasoq. Kommune Kujalliup nalunaarusiaagallartumut oqaaseqaatai atuareerlugit suli isumaqarpunga, utoqqaat illuat suliniutinik taama ittunik aallartitsisariaqartoq.
- Kommuni Kujalliulli paasinninnera imatut paasisariaqarpara sulisunik illersorneqarsinnaasumik amerlassusilinnik sulisoqartuarnissaa qulakkeerniarlugu iliuuseqartoqassasoq inassuteqaatiga kommunip malissinnaanavianngikkaa. Tamanna ernumanarluinnartutut isigaara.