Skip to main content

Ernumagineqartut: Pujoralaat, nipiliorneq sajuppillattoqartarnissaalu

Munck Gruppenimi siuttut, Nuummi nutaamik mittarfiliortussat, ippassaq unnukkut ilisimatitsissutitut ataatsimiisitsinermi, sanaartornerup nalaanni pujoralannut, nipiliortoqarnissaanut sajuppillattoqartarnissaanullu tunngatillugit takkuttut eqqissisarniarsarivaat

Nuummi innuttaasut 100-ngajaat mittarfiliornissarsuarmut tunngatillugu paasisaqarnerorusullutik pingasunngormat unnukkut ataatsimeeqataapput. Munck Gruppen siullermeerluni sanaartornissaq pillugu saqqummiussillunilu oqaluttuarpoq.

Civilingeniøri Per Midjord, Savalimmiuneersoq ukiuni kingullerni 40-ni nunarsuarmi tamarmi sanaartornernut annertuunut peqataasarsimavoq. Sanaartornerit marluk timmisartoqarfiliassanik annertunerusut peqataaffigisimasai tassaapput: Storebæltsbroen aamma Øresundsbroen.

- Mittarfiliornissaq suliassaavoq annertoorujussuaq, fastslog Per Midjord, tunisassiornermi pisortatut atorfilik erseqqissaavoq.

Munck Gruppenimi pilersaarusiornermi pisortaq Orla Nielsen suliffeqaffik maanna Nuummi takussaalersussaq pillugu oqaluttuareermat, Per Midjord mittarfiliorluni mittarfiullu saavani inissaliorluni suliassaq itisilernerullugu oqaluttuarpoq.

Apeqqutit akissutillu

Innuttaasut takkussimasut apeqqutissarpassuaqarsimapput, taakkunani nipiliortoqarnissaa pujoralatserusoqarnissaalu pingaartumik ernumagineqarlutik.

Apeqqutigineqartunut akissutigineqartut imatut nipeqarput:

Sisoraatinut majuartaat sanaartornermi atorneqarsinnaassaaq.

Sisoraatinut majuartaammi pujoralatserisoqannginnissaa qulakkeerneqarsinnaanngilaq.

Sanasut pujoralannik siaruatsaaliuisinnaapput, pineqartut qaavinut magnesiumkloridimik, pujoralammik nipputsitisartumik tissalukaarussinikkut.

Qillerutit nipikillisaatitaqarput.

Qaartartut atorneqartussat, VVM pillugu nalunaarusiami atorneqartussatut saqqummiunneqartunut sanilliullugu avatangiisinut ajoqusiinnginnerusarput.

Dozerit atornagit, gummigedit nipikinnerummata atorneqassapput.

Qaqqami timmisartoqarfiup eqqaaniittumi quppat arlallit, qaartiterinermut atatillugu sajuppillannernut annikillisaataassapput.

Arfininngormat kingullermi qaartitsisoqarmat nipimit sakkortunerusumik innuttaasut misigisaqassanngillat.

Sajuppillatsitsinaveersaartitsisoqassaaq qaartitassat millisekundialunnguit allortarlugit qaartittarnerisigut.

Najugaqavissut arfinillit atorfinitsinneqareerput, naatsorsuutigineqarporlu allanik qulinik atorfinitsitsisoqassasoq. Taakku saniatigut sulisussat 50-iniit 60-inut amerlatigisut tikisinneqassagunarput.

Timmisartoqarfiup kujaataata tungaa asfaltilersoreerlugu 2021-mi aasakkut naammassineqareersimassaaq. Ukiut marluk qaangiunneranni avannaata tungaa naammassineqarsimassaaq.

Aatsaat qaqqamik qaartiterineq asfaltilersuinerlu naannassineqarpata sulisussat allat, qullilersuisussat, kussiortussat il.il. pisariaqartinneqalissapput.

Kujataata tungaani sulisoqarnera ilutigalugu avannaata tungaaniittoq saviminikunut eqqaavik matoorneqassaaq.

Ippik portunerpaaq qaqqap ujarattaanik sananeqartussaq 50 miiterisut portutigissaaq.

Ilusiliorluni titartaasartoq Peter Barfoed, mittarfissap inissisimaffissaanut akerliusupilussuaq saarlernut ilaalluni issiavoq apeqquterpassuaqarlunilu arlalinnik qungujutsitsillunilu

ersaattaanneqartartunik.

- Ullormut akiligassat qanoq annertutigisassappat, Peter Barfoed aperivoq.

- Naluara. Piffissaliussarmi eqqorlugu suliaq naammassissavarput, Orla Nielsen jyllandimiorpallalluni quiasuppalullunilu oqarpoq.

Orla Nielsen og Per Midjord fra Munck Gruppen stod for første gang ansigt til ansigt med byens borgere
Leiff Josefsen

 

Innuttaasunik tatiginnitsitsilernissaq pilersaarusiornermi pisortat marluullutik pingaartinnguatsiarpaat. Per Midjord nuna maanna suliffigisani akueralugu qaqortumik annoraalersimavoq, aamma ajornannginnerusumik innuttaasunut akulerussinnaaniarluni.

CSR-mik akisussaaffeqarneq

- Neriuutigaarput illoqarfiup ilaatut inooqataalerumaarluta aamma pitsaasumik tunniussaqarumaarluta, pilersaarusiornermi pisortaq oqarpoq.

Tusarnaartut ilaata oqaluttuaraa, Munck Gruppen Bangladeshimi suliniuteqarnermut atatillugu meeqqanut aqqusinermi inuusunut annertuumik tunnissoqarsimasoq.

- CSR – najukkami inuiaqatigiit pillugit akisussaaffipput – uagutinnut pingaarutilipilussuuvoq, Orla Nielsen erseqqissaavoq.

Paasissutissiinerit oqallinnerlu nalunaaquttap akunneri marluk avillugit sivisutigisumik ingerlanneqarput, apeqqutillu politikkikkut aalajangiinernut sangutinneqaraangata aqutsisoq taamaallaat akuleruttarluni.

Sermiligaami nunaqarfiup orpia kiisami ikinneqartoq
Sermiligaami silarlunnera peqqutaalluni pilersaarut malillugu orpik ikinneqanngitsoorpoq. Silali qatsuunnartoq nunaqarfimmi innuttaasut orpiup ikinnera nalliuttorsiutigaat.
Tunngaviit pingasut meeqqerivinni sulisut eqqarsartaatsimikkut peqqissusaat pitsaanerulersissavaat
Meeqqanut Atuarfeqarnermullu Ingerlatsiviup meeqqerivimmi sulisut eqqarsartaatsimikkut peqqissusaat pitsaanerulersinniarlugu misiliummik suliniummik aallartitsipput. Siullermik Nuummi meeqqeriviit...
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

Seneste Ugeavis

SENESTE NUUK - NYHEDER