Ernisussiortut coronamik tunillatsittoqarsinnaanera ernummatigaat

Ernisussiortut pingaartumik naartusut coronavirusimik tunillatsissinnaanerannut ernummateqarput, peqqinnissaqarfimmi sulisut Danmarkimeersut ulluni tallimani mattusimasussaanermut malittarisassanut ilaatinneqannginnerat pissutigalugu.

Ernisussiortut Kattuffiata tikerlaat ingerlaannartumik peqqinnissaqarfimmut suliartorsinnaanerannik Peqqissaasut Kattuffiannit ernummatigineqarnera ilalerpaat.

- Ernisussiortut Kattuffianit uppernarsarneqarpoq, Peqqinnissaqarfiup allanut qanillinaveersaarnissamik, eqqiluisaarnissamik attassuteqannginnissamillu inassuteqaatai malinneqassasut, atorfinitsinneqaqqammersorli immikkut killilersuisoqaraluartoq aamma sulisunut malittarisassaqaraluartoq misissorteqqinnermini COVID-19-imik tunillatsissimappat pinngitsoorani tuniluuttoqaleriaannaasoq isumaqarlutik, Ernisussiortut Kattuffiata siulersuisuini siulittaasoq Anne Schurmann oqarpoq.

Naartusut immikkut ulorianartorsiortunut ilaasut

Ernisussiortut naartusut immikkut ulorianartorsiortunut ilaasutut oqaatigineqartut sinnerlugit immikkut ittumik ernummateqarput. Naartusut coronap tuniluunnerani immikkut ulorianartorsiortunut ilaapput, tassa aseruuttuukulanerusinnaasarnerat pissutigalugu. Nunatsinni Nakorsaaneqarfiup nittaragaa naapertorlugu, naartusut COVID-19-imik sakkortuumik nappaalalernissaminnut aarlerinartorsiornerat annertunerusoq uppernarsineqarsimanngilaq.

- Uppernarsaatissaqartinneqarporli, naartusut ilaat erninissamut qaammatit pingasuinnanngortullu COVID-19-imik napparsimallutik unitsinneqaraangata, piffissaq sioqqullugu pilatsillutik ernisinneqartarnerat, matumanilu meeraq erniffissaq sioqqullugu erniusoq tamatuma malitsigisaanit aarlerinartorsiortinneqartarpoq, Nunatsinni Nakorsaaneqarfiup nittartagaatigut ilisimatitsissutigineqarpoq.

Ernisussiortunit erseqqissaassutigineqarpoq, Danmarkimi aalajangiunneqarsimasoq naartusut coronavirusimik tunillatsinnginnissaat anguniarlugu atassuteqarnissamut immikkut mianerinnittoqarnissaa.

- Taamaammat EK-mit ernummatigineqarpoq, naartusut pilersaarutaasumik tassanngaannartumilluunniit ernisarfimmi misissortittussat tikerlaamit ilinniartinneqartumit misissorneqarneranni tunillatsissinnaanerat, EK tusagassiorfinnut nalunaaruteqarluni allappoq.

Sulisussanik amigaateqarneq

Peqqissutsimut Pitsaaliuinermullu Aqutsisoqarfimmi pisortap Joanis Erik Køtlumip Sermitsiaq.AG-mut nassuiaatigisimavaa, tikerlaat malittarisassanut ilaatinneqannginnerannut sulisussanik amigaateqarneq pissutaasoq. Sumiiffiit ilaanni peqqinnissatigut sulisussanik pisariaqartinneqarluinnartunik amigaateqartoqarpoq. Taamaammat tikerlaat ulluni tallimani mattusimasussaanermut malittarisassanut ilaatinneqanngillat, illertuutinilli atuisussaapput aamma anapparsimasunut, taakku ilaqutaannnut suleqatinullu sapinngisaminnik qanillinaveersaartussaallutik.

Powered by Labrador CMS