Ernisarfiup matuneqarnissaa ataatsimiititaliamut ilisimatitsissutigineqarsimanngitsoq
Kujataani qitiusumik peqqinnissaqarfimmi ernisarfiup matugallarneqarnissaa avaqqunneqarsinnaajunnaarluinnalertoq Naalakkersuisunit aasaq 2022-mi ilisimaneqalerpoq. Ernisarfiummi ammatiinnarneqarnissaanut nakorsat upalungaarsimasussaasut atorfinitsinniarneri ajornakusoorpoq. Ataatsimiititaliaq matusigallarnerup aqaguani ilisimatinneqarpoq.
Inatsisartuni ilaasortaq Anna Wangenheim (D) peqqinnissaqarfiup kujataani qitiusumik immikkoortortaqarfiani ernisarfiata Qaqortumiittup matugallarneqarnissaanut politikkikkut aalajangiisoqarsimanera, aalajangernissamullu tungavilersuutit pillugit naalakkersuisumut paragraf 37 atorlugu apeqquteqarfigai. Ernisarfimmik matusigallarneq nutaarsiassaqartitsivikkut 29. august nalunaarutigineqarpoq.
Matusigallartoqarnerata kinguninngua paasinarsivoq peqqinnissaqarfimmi sulisut matusigallarnissaq pillugu aqutsisunit ilisimatinneqarsimanngitsut, attaveqatigeeriaaserlu isornartorsiorneqarluni.
Anna Wangenheimip ilaatigut apeqqutigaa inatsisartuni ilaqutariinnut peqqissutsimullu ataatsimiititaliaq aalajangiisoqarnerani sooq ilisimatinneqarsimanngitsoq. Anna Wangenheim ataatsimiititaliami siulittaasup tulleraa.
- Ulloq 30. august 2022 llaqutariinnermut Peqqissutsimullu Ataatsimiititaliamut, Kujataani lmmikkoortortaqarfik pilattaanikkut ernisitsisartunik piareersimasunik amigaateqartoqarnera pillugu ilisimatitsissummik nassiussisoqarsimaneranik ilisimatitsissutigineqarsinnaavoq. llisimatitsissummi allassimavoq Kujataani lmmikkoortortaqarfik arnat piffissami aggusti 2022-mit januaari 2023-mut erninissamut killeqartut, Nuummi Dronning lngridip Napparsimavissuani erninissamut neqeroorfigineqassasut, peqqissutsimut naalakkersuisoq Mimi Karlsen (IA) Anna Wangenheimip (D) paragraf 37 atorlugu apeqquteqaataanut akissuteqarluni allappoq.
Matusigallarnissaq pillugu nutaarsiassanut ilisimatitsissoqareersorlu ataatsimiititaliaq aqaguani aatsaat ilisimatinneqarsimavoq. Naalakkersuisoq ilanngullugu ilisimatitsivoq august 2022-miit januar 2023 tungaanut Qaqortumi naartusut arfineq-marluk illoqarfigisartik qimallugu erniartortussanngorsimasut.
Aqutsisut pissutsit ilisimagaat
Peqqinnissaqarfiup kujataani qitiusumik immikkoortortaqarfiani nakorsat, peqqissaasut ernisussiortullu aqutsisui, kiisalu peqqissutsimut naalakkersuisoq Qaqortumi ernisarfiup matugallarneqarnissaa pillugu ataavartumik ilisimatinneqartarsimapput.
Peqqissutsimut naalakkersuisoq Mimi Karlsen ilisimatitsivoq.
- Peqqissutsimut Naalakkersuisoq aasap ingerlanerani Peqqinnissaqarfimmi sulisoqarniarnikkut pissutsit pillugit allakkatigut oqaatsitigullu Peqqissutsimut Naalakkersuisoqarfiup, Nunatta Nakorsaaneqarfiata aamma Peqqinnissaqarfiup ataatsimeeqatigisarnerisigut ingerlaavartumik ilisimatinneqartarpoq, Mimi Karlsen akissutimini ilisimatitsivoq.
Sulisussaqarniarneq pissutigalugu peqqinnissaqarfimmi sullissineq aasaanerani annikinnerulissasoq Naalakkersuisut siusinnerusukkut nalunaarutigereerpaat.
