Ernisarfimmik matusisoqarnera isornartorsiorneqartoq: - Naalakkersuisut suligasuartariaqalerput

Peqqinnissaqarfimmi sulisunik Danmarkimeersunik suliussarsiornermi periuserisaq ajutoorsimasoq, Demokraatineersoq Anna Wangenheim isumaqarpoq. Taassuma Naalakkersuit kaammaatorpai, nunanut allanut - tassunga ilanngullu Cuba-mut - peqqinnissaqarfimmi sulisussanik pisariaqartinneqartunik sulisussarsioqqullugit.

- Atugarissaarnikkutajalusoorujussuarnertut isigaara, politikkillu tungaaniit peqqinnissatigut immikkoortortaqarfikimmikkut sammineqartariaqarpoq, Anna Wangenheim (D) oqarpoq.

Ataasinngornermi saqqummiunneqarpoq, Kujataani arnat ernisussat ukiup sinnerani Nuummut erniartortinneqartassasut. Tamatumunnga pissutaavoq, Qaqortup Napparsimmaviani ernisitsisoqaqqissinnaannginnera, sulisussanik pisariaqartinneqartunik sulisussarsiornerup iluatsinneqarsimannginnera pissutigalugu.

Erninermimi ajortumik pisoqartillugu pilattaasartunik piareersimasoqartussaasoq, Peqqissutsimut Naalakkersuisoq Mimi Karlsen (IA) ataasinngornermi ilisimatitsivoq.

Demokraatini peqqissutsimut oqaaseqartartup politikkikkullu siulittaasup tulliata Anna Wangenheimip taamatut inissittoqarnera sakkortuumik isornartorsiorpaa.

- Ajalusoorujussualersoq

- Atugarissaarnikkut ajalusoorujussuarnertut isigaara, politikkillu tungaaniit peqqinnissatigut immikkoortortaqarfik immikkut sammineqartariaqarpoq, taanna tusagassiorfitsigut nalunaaruteqarluni allappoq.

Politikkerip aammaarluni Naalakkersuisunut kaammattuutigaa Cuba-mut qiviaqqullugit:

- Naalakkersuisut sakkortuumik piumaffiginiarpakka sulilersitsiniaanermut siunissamut isigisunik, aningaasatigut, piginnaasatigut inuttassatigullu ataavartussamik suliniuteqaqqullugit..

Karlsen: Arlalippassuit misissorneqassapput

- Italia maannakkorpiaq Cuba-miit nakorsanik 300-nik pissarsileruttorpoq, europallu sinnerata nakorsanik Cuba-meersunik pissarsisarneq malinnaaffigileruttorpaat. Maanna ukiorpaalunngulersuni Demokraatiniit sulilersitsiniaasarnermut unammillernartumiinnitsinni aaqqiissutitut tikkuareersimasarput.

Peqqissutsimut Naalakkersuisup Mimi Karlsenip (IA) aasaq siusinnerusukkut ilisimatitsissutigaa, Naalakkersuisut Cuba-meersunik sulisussarsiornissamik suliniuteqanngitsut, tassungali taarsiullugu nunarsuaq tamakkerlugu sulisussarsiorneq ukkatarineqartoq.

Inunnik Nunanit Avannarlerniinngitsunik peqqinnissaqarfimmut sulisussarsiorniaraanni arlalinnik misissuisoqaqqaartariaqarpoq. Ilaatigut nunanit allanit ilinniakkat aamma akuersissutit akuerineqarnissaat, Mimi Karlsen taamanikkut taamatut nassuiaateqarpoq.

Ernisarfiit arlallit ukiuni kingullerni matuneqarsimasut

2019-imi Aasiaat ernisarfittut matuneqarmat oqallittoqangaatsiarpoq. Allatut eqqarsartoqartariaqalersoq, Anna Wangenheim oqarpoq:

- Ilami Aasiaat 2019-mili ernisarfittut ingerlaneqanngilaq, Qaqortoq matuneqarneratulli
neriorsuisoqarsimagaluartoq maanna IA aqutsisuliullugu ukioq kingullerli Naalakkersuisut
pingaarnersiuinerarlutik oqariartuuteqaraluarlutik aaqqiissutissanik tigussaasunik
tikuussisimanngippata politikkikkut angusaqanngilluinnarneruvoq, Anna Wangenheim isornartorsiuilluni oqarpoq.

Sermitsiaq.AG-mit peqqissutsimut naalakkersuisoq isornartorsiummut oqaaseqartinniarneqarpoq.

Powered by Labrador CMS