Ernisarfimmik matusineq isornartorsiorneqareersoq: - Sukkanerusumik aaqqiissuteqarsinnaanngilagut
Peqqinnissaqarfimmi sulisussanik nunanit allaneersunik atorfinitsinermi oqaatsitigut suliatigullu piginnaasaqarnissap qulakkeerneqarnissaa pingaaruteqarpoq. Tassa Qaqortup ernisarfittut matuneqarneranut atatillugu sukkanerusumik aaqqiissutissaqanngilaqut, Peqqissutsimut Naalakkersuisoq oqarpoq.
Qaqortup Napparsimmaviani ernisarfik sapaatip-akunnerata matuma allartinnerani matuneqarpoq. Arnat Nuummut maanna erniartortinneqartalissapput.
Matusinermut pissutaavoq illoqarfimmi pilattaasinnaasunik upalungaarsimasoqannginnera, matusinerlu Demokraatit peqqissutsimut atatillugu oqaaseqartartuanit Anna Wangenheimimit sakkortuumik isornartorsiorneqarpoq, taanna oqarpoq, Naalakkersuisut peqqinnissaqarfimmi sulisussanik Nunat Avannarliit avataanneersunik atorfinitsitsisoqarnissaa anguniarlugu atorfinitsitsiniarlutik periuserisartik ingerlaannartumik allanngortittariaqaraat.
Naalakkersuisulli sulisussaaleqinermut sukkanerusumik aaqqiissuteqarsinnaannginnerarput. Peqqissaarussamimmi ilinniartitsisoqarnissaa pisariaqartoq, peqqissutsimut naalakkersuisoq isornartorsiumut akissuteqarluni tunngavilersuivoq:
Oqaatsitsigut suliatigullu piginnaaqarnisssat qulakkeerneqassasut
- Peqqinnissaqarfimmit sulisussanik pisariaqartinneqartunik tamaviaarluni sulisussarsiortoqarpoq, sulisussarsiarineqartulli Peqqinnissaqarfimmi suliassanik ingerlaannartumik isumaginnissinnaalernissaat ilimananngilaq. Assersuutigalugu Islandimi nunanit allaneersunit peqqinnissaqarfimmi sulisussanik atorfinitsitsigaangamik ukiut marluk angullugit ilinniartitsisarput.
- Matumani pineqarput, oqaatsitigut suliatigullu piginnaasaqarnissap qulakkeerneqarnissaa. Tamatuma saniatigut inissaqartitsiniarnikkut, atuarfimmi meeqqerivinnilu inissaqartitsiniarnikkut aappaasullu suliffissaqartinniarnerinut atatillugit arlalitsigut aporfeqartoqartartoq ilisimaneqarpoq, Peqqissutsimut Naalakkersuisoq Mimi Karlsen (IA) Aanna Wangenheimip isornartorsiutaanut allakkatigut akissuteqarluni oqarpoq.
Peqqissutsimut atatillugu oqaaseqartartup oqaatigaa, peqqinnissaqarfimmi sulisussanik Danmarkimeersunik suliussarsiornermi periuserisaq ajutoorsimasoq, Danmarkimi aamma sulisinnaasunik taakkunannga pisariaqartitsinerujussuaq pissutigalugu.
Ernisarfiit ammaqqinniarpat?
Mimi Karslenip oqaatigaa, Naalakkersuisut nunanit allanit nalinginnaasumik sulisussarsiorfigineqarneq ajortunit sulisussarsiornissamut periarfissaqartoq eqqumaffigigaat, peqqissutsitsigulli suliassat isumannaatsumik ingerlanneqartussaasut oqaatigalugu.
Apeqqut: Ernisarfiit ammaqqinneqarsinnaanerat piviusorsiortuua?
- Naatsorsuutigaarput siunertaralugulu ernisarfiit atuutsiinnarneqarnissaat. Ernisarfiit nunami maani ataavartumik matoqqatinneqassanersut politikkikkut suli aalajangiiffigineqanngilaq, Mimi Karlsen akissuteqarluni oqarpoq.