Skip to main content

Erniat pillugit siunnersuut Namminersorlutik Oqartussat iluini aamma isornartorsiorneqarpoq

Naalakkersuisut ernianik ilanngaateqarsinnaatitaaneq atorunnaarsikkusuppaat, tassungali taarsiullugu ernianut tapiissutinik atuutsitsilerusunnerat arlalinnit allaffissornerulertoqarnissaa oqaatigineqarluni isornartorsiorneqarpoq. Namminersorlutik Oqartussani naalakkersuisoqarfimmit ataatsimit aamma isornartorsiorneqarpoq. Naalakkersuisulli isornartorsiuineq ilalinngilaat.

Aningaasaqarnermut Naalakkersuisup Naaja H. Nathanielsenip (IA) pingasunngornermi ualikkut nalunaarutigaa, inatsisissatut siunnersuutit arlallit politikkikkut tapersersorneqannginnerat pissutigalugu tunuartinneqartut.

Inatsisissatut siunnersuutini pineqarput biilinut akitsuutinik allannguiniarneq, tassani ilaatigut plugin-hybridbiilit akitsuuserneqarniarnerat kiisalu akileraarutitigut ernianik ilanngaanneqarsinnaanerup atorunnaarsineqarniarnera, tassungalu taarsiullugu erniatigut tapiissuteqartarnissamik atuutsitsilerniarneq.

Naaja H. Nathanielsen naapertorlugu, siunnersuutitigut sulinermut ilanngaatip qaffanneqarnissaa aningaasalerneqassaaq - tassa innuttaasut suliffeqartut akileraarutitigut annikillisaaffiginiarlugit.

Siunnersuutit taakku marluk tusarniaaffigineqarneranni annertuumik akerlerineqarsimapput. Ernianik ilanngaanneqarsinnaanerup atorunnaarsinneqarnissaa, tassungalu taarsiullugu erniatigut tapiissuteqartalernissamik siunnersuutip tusarniaassutigineqarnerani akissutinik takunnissimanerup takutippaa, Namminersorlutik Oqartussani naalakkersuisoqarfimmit ataatsimit siunnersuut isornartorsiorneqangaatsiartoq.

Tusarniaaffigineqarsimasut arlallit assigalugit Ineqarnermut Attaveqaasersuutinullu Naalakkersuisoqarfimmit nalilerneqarpoq, siunnersuut allaffissornerulernermik nassataqassasoq:

- Tunngavilersuutigineqartut naammanngitsut

- Naalakkersuisoqarfimmit nalilerneqarpoq, ernianik ilanngaassisarnerup erniatigut tapiissuteqartarnissamik taarserneqarnera maanna aaqqissuussamut sanilliullugu allaffissornerulernermik nassataqassasoq. Naalakkersuisoqarfimmit ernummatigineqarpoq, aaqqissuussaq innuttaasunut paasiuminaassinnaanera, naalakkersuisoqarfik allappoq, nangillunilu:

- Erniatigut tapiissuteqartalernissamik aaqqissuussap atuutsinneqalerniarnera  immikkut allaffissortoqalernissaa eqqarsaatigalugu iluaqutaasussatut oqaatigalugu tunngavilersuisimaneq naammangissorinarpoq, tassa ernianik ilanngaassisarnerup allanngortinneqarnissaanut assersuukkaanni.

Aallaffissornerulernissamik naatsorsuuteqarnerup isornartorsiorneqarnerata saniatigut naalakkersuisoqarfimmit siunnersuummi siunertarineqartut arlallit qularutigineqarput, soorlu siunnersuut malillugu innuttaasut ileqqaaruteqarnerulernissaannik kiisalu nammineq inigisassaminnik pisiaqarusussuseqalernissaanik naatsorsuuteqaneq qularutigineqartoq.

Naalakkersuisoqarfiup allaffissornerulertoqarnissaanik naliliisimanera nunami maani kukkunersiuisartunit marlunnik ilalerneqarpoq - Deloittemit aamma Grønlands Revisionimit. 

Kukkunersiuisartut isorinnilluinnartut

Kukkunersiuisartut aamma inatsisissatut siunnersuummut tusarniaaffigineqarsimapput, taakkulu naliliipput, erniatigut tapiissuteqartarnissaq nunami maani akileraartarnermut inatsimmik paasiuminaannerulersitsissasoq:

- Allatut aaqqissuussinissamik kissaateqarneq ajorinngilarput. Akerlianilli allatut aaqqissuussiniarnermi periuserisaq isorilluinnarparput. Siunnersuutigineqartut atuutsinneqalissappata allaffissornerulertoqangaatsiassaaq, Deloittemit aamma Grønlands Revisionimit ataatsimoorluni tusarniaassummut akissuteqarlutik allapput, nangillutillu:

- Aamma siunnersuutigineqartut politikkerit innuttaasullu siunissami namminersulivinnissamik kissaateqarneruleriartornerannut killilimmik iluaqutaassapput, siunnersuutigineqartummi malillugit qaffasissumik ilinniagaqarsimasunik sulisoqarnissaq pisariaqartinneqartussaavoq, Kalaallimmi Nunaanni qaffasissumik ilinniagaqarsimasut maannakkorpiaq pigineqanngillat, taamaammallu avataaniit sulisussarsiortoqartariaqarluni.

Kalaallit Nunaanni Sulisitsisunit aamma taamak nipilimmik oqaaseqartoqarpoq:

Naalakkersuisoq isumaqataanngitsoq

- Inatsisissatut siunnersuutigineqartut taakku marluk akileraartarnermik aqutsisoqarfimmi allaffissornerulersitsissapput, tamatumalu malitsigisaanik sulissanik allanik pisariaqartitsisoqalissalluni, taakkununnga ilanngullugit inatsisilerituut arlallit pisariqartinneqalertussaallutik.

- Ingerlatsinermi allaffissorneq tamatuma sukkulluunniit ajornaannerulersinnagulu annikillisinnavianngilaa, Kalaallit Nunaanniu Sulisitsisut allapput.

Naalakkersusup inatisissatut siunnersuut ukiakkut ataatsimiinnermi saqqummiunneqassanngitsoq pingasunngornermi suli saqqummiutinngikkaa, Sermitsiaq.AG-mit isornartorsiuineq apeqqutigineqarsimavoq. Tassan Naaja H. Nathanielsen isornartorsiummut ilaliinngilaq:

- Isumaqarpunga ajornaannerulersitsinissaq matumani pineqartoq, naalakkersuisoq Sermitsiaq.AG-mut akissuteqarluni ilisimatitsivoq.

Aaqqissuusseqqinnermik suliaqarneq ingerlatiinnarneqassasoq

Inatsisissatut siunnersuutit taamaatiinnarneqartut akileraartarnermik aqqissuusseqqinnermut ilaapput. Suliaq tamanna ingerlatiinnarneqassaaq, Naaja H. Nathanielsen pingasunngornermi oqarpoq:

- Akileraartarnermik aqqissuusseqilluni suliaqarneq ingerlatiinnarneqassaaq, tamannalu pillugu qaammatini aggersuni saqqummiussinissara qilanaaraara, naalakkersuisoq oqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER