Erngup mingutsinneqarnera: Uummannami erngup mingutsinneqarneranit qaammatinngorpoq
Sulisup kukkuluttornerminit Uummannami imeq imerneqartussaq uuliamik akusoorneranit qaammat ataasinngorpoq. Nukissiorfiit tankit imiisiviit salinnissaannut pilersaaruteqarput.
Uummannami erngup uuliamik mingutsinneqarneranit qaammat ataaseq qaangiuppoq. Mingutsitsisoqarsimanera septemberip 20-ani paasineqarpoq, erngertumillu erngup kuuffimmit kuuttup atorneqannginnissaa imerneqannginnissaalu nalunaarutigineqarluni.
Inuup kukkuluttornerata kinguneranit innuttaasut imermik atuissagaangamik imissagaangamilluunniit, illoqarfimmi imernut tankinut imertariartortariaqalerput. Imertartarfiusinnaasut tankersuit aqqaneq-marluk illoqarfiup iluani sumiiffinni aalajangersimasuni inissinneqarsimapput.
Uummannami illut namminneq imiisivinnik tankeqartut imermik pilersorneqaqqilernissaannut Nukissiorfiit pilersaarusioreersimapput. Tankit imiisiviit siullermik imaarneqassapput imermillu immeqqinneqarlutik. Imerneqareerpata Nukissiorfiit misiliutissanik marlunnik tigusissapput, misissuisarfimmilu angallattakkami misissugassat misissorneqassallutik. Akunnialunnguit ingerlaneranni misissugaq akissutissarsineqartassaaq.
- Nakkutilliisutut oqartussaasut periuseq akueraat, tassa Nukissiorfiit imermik misissugassamik marloriarlutik qalusisassasut, taakkualu sumiiffimmi misissorneqartassasut. Misissukkat inernerini marluusuni ammut killissarititaasoq ataanneqarsimappat Nukissiorfiit sullittagaq ilisimatissavaat imermik atueqqilersinnaanerat pillugu.
Tanki imiisivik uuliamit mingutsinneqarsimassappat, Nukissiorfiup salinnera isumagissavaa, kingoratigullu imermik immeqqissallugu.
Imermut tankinut ikkussukkat illoqarfimmiittut siulliit aqqanillit ulikkaarlugit ippassaq immerneqarsimasut Nukissiorfik ilisimatitsivoq. Imermut tankit ikkussukkat sinneri imermik immerneqarsinnaalernissaat sulissutigineqartoq ilisimatitsissutigineqarpoq.
Illut 117-it imiisivinnik tankeqarput uuttuuteqarlutillu, taakkulu Nukissiorfiup imermik pajunneqartarnissaat isumagisaraa.
Ullormut misiliutit 30-it
Imeq imeqarfimmeersoq imerneqarsinnaalersoq, nakkutilliisut sapaatip akunnerani uani nalunaarutigaat. Tamanna isumaqarpoq Uummannami imeqarniarneq ajornannginnerulersoq, assersuutigalugu Ikerasammut imermik aallertoqartariaarummat.
Imermik pilersuisussaasoq erngup aqqutaanik kuutsitsilluni qaammatip ataatsip ingerlanerani saliivoq.
- Nakkutilliisutut oqartussaasut akuerisarpaat erngup imerneqartussatut imaluunniit uffarnermut/atisanik errorsinermut atorneqarsinnaaneranut tunngasoq. Nukissiorfiit Uummannami sulisut amerlivai taamaaliornikkut suleqatigiit marluk immikkut sulipput, ullormullu misissugassat 30-t misissorneqartarput, tusagassiutinut nalunaarutigineqarpoq.
Innuttaasut pitsorluttut imermik kommunimit pajunneqartarput.
Innuttaasunik ataatsimiisitsineq
Nukissiorfiit Uummannami innuttaasunik sisamassaaneerluni sisamanngornermi ataatsimiisitsimmat innuttaasut 100-t missaat peqataapput. Ingerlatsinermut pisortat Lars Hoffmeyer aamma Kjell Bergmann aammattaaq imermut tunngasunik immikkut ilisimasalik Kenneth Larsen, killiffik pillugu aamma imermut tunngatillugu aallartinneqarsimasut pillugit nassuiaassipput, innuttaasullu apeqqutaat akillugit.
Ernummatigineqartut ilagaat erngup aqqutaata kuutsitsivigalugit salinneqarnerannut tasersuaq imeqarfiusoq saliinermik nammassisinnaanersoq.
Nukissiorfinnit akissutigineqarpoq ajornartorsiut tamanna assut eqqumaffigineqartoq, kisianni tatsimi imeqassutsip saliinerit nammassinnaagai.