Erngunneq hashilu: Maanna inuusuttunut katsorsaasoqartalissaaq

Inuusuttunut imigassamik imaluunniit hashimik atornerluisunut katsorsaanissamut neqerooruteqanngilaq. Tamanna illoqarfinni tallimani katsorsaaveqarfiusuni allanngortinneqassaaq.

Inuusuttut 15-it aamma 24-t akornanni ukiullit 700-t aamma 1.800 akornanni amerlassuseqartut aanngajaarniutinik atornerluisuupput, atornerluinerlu annertummat katsorsarneqartariaqarlutik. Peqqissutsimut naalakkersuisoqarfik tamanna missingiutigaa.

Minnerunngitsumillu ullumikkut inuusuttunut toqqaannartumik toraagalimmik katsorsaanermik peqanngilaq. Kisianni pilersaarutip nutaap, maanna tusarniaassutigineqaleqqammersup tamanna allanngortissavaa.

Pilersaarut piviusunngortinneqassappat illoqarfinni tallimani katsorsaavinnik pilersitsisoqassaaq. Taakku Allorfinni pioreersunut ilaatinneqalissapput.

- Kommunit tallimat illoqarfiini anginerni tamanit katsorsaavinnik pilersitsisoqarneratigut katsorsaaviit 15-25-inik ukiullit inuusuttut 60,5 procentiinik sullissisinnaapput, illoqarfiit ilinniarfeqarfiusut angisuut illoqarfiillu amerlanerit meeqqanut inuusuttunullu ulloq unnuarlu paaqqinniffeqartut, pilersaarummut siunnersuummi tamanna allaqqavoq.

Inoqarfinnut minnerusunut neqeroorummik tamanna ilalerneqarpoq.

- Katsorsartinnermi pisariaqartitsisoqarnerani katsorsaavinni atorneqartut katsorsaanerit aallaaviatigut atorneqassapput, kisiannili internettikkut taanna piffissami sivikitsumi piffissani sumiiffinni ulluinnarni katsorsaanernik ataqatigiissinneqassallutik, taama siunnersuuteqartoqarpoq.

Ataqatigiissumik suliniuteqarneq

Katsorsaaneq kisimiitinneqassanngilaq. Akerlianik inuusuttut piffissaatillugu tiguneqartarnissaat anguniagaavoq, atornerluineq sapinngisaq tamaat pitsaaliorneqarniassammat. Tamanna pitsaaliuinermik suliaqarnermit ajornartorsiutit aallartilernerannit suliniuteqarnikkut aamma katsorsaaermut ingerlanneqarnera pilersaarusiorneqassaaq.

Taakku suliniutit tulleriiaartut siunnersuut naapertorlugu ima isikkoqassapput:

  • Nalinginnaasumik pitsaaliuineq
  • Aalajangersimasumik pitsaaliuineq
  • Meeqqanut inuusuttunullu aanngajaarniutinik ajornartorsiuteqaleriartortunut neqeroorutit
  • Unitsinneqarnani katsorsaanissamut neqeroorut
  • Ulluunerani katsorsartinneqarneq
  • Katsorsaanissamut neqeroorut peqatigisaanillu avatangiisini katsorsaanikkut suliniut

Taakku saniatigut uku pillugit suliniutinik pilersitsisoqassaaq:

  • Meeqqanut inuusuttunullu angerlarsimaffimmi aanngajaarniutinik imaluunniit aningaasanoorajunnermik ajornartorsiuteqarfiusumi alliartorsimasunut neqeroorutit
  • Angajoqqaanut meeqqanik aanngajaarniutinik ajornartorsiuteqartunut neqeroorutit
Powered by Labrador CMS