Skip to main content

Eriup eqqunngitsumik saqqummiussisoqarsimanera pillugu Múte taperseraa

TV2-p qinersisoqanngitsiarnerani eqqunngitsumik oqaluttuarsimasup kinaanera saqqummiuttariaqarpaa, Siumumi siulittaasoq oqarpoq.

Qineqqusaanermi akerleriittasarsimapput, maannali Siumumi siulittaasup Erik Jensenip politikkereqatini Múte B. Egede Inuit Ataqatigiinneersoq tapersersorpaa.

Tassa upernaaq Inatsisartunut qinersisoqarnissaa sioqqullugu TV2-p eqqunngitsumik saqqummiussisimaneranut atatillugu tapersersorpaa. Saqqummiussami oqaluttuarineqarpoq, Múte B. Egede suliat marluk aningaasaqarnermigut iluaqutigisimasani pillugit suliarineqarneranni attuumassuteqarpallaartutut peqataasimasoq.

Oqaluttuarineqarsimasorli eqqortuunngilaq, TV2-llu ilanngutassiaminik saqqummiussinnginnermini pasilliutigineqartut Múte B. Egedemut saqqummiussimanngilai.

Múte B. Egedep sapaatip akunnerata matuma aallartinnerani danskit aviisiannut Berlingskemut oqaatigisimavaa, oqaluttuarineqarsimasoq Kalaallit Nunaanni oqartussaaqataanermut akornuseeqataassasoq, taamatullu isornartorsiuinera Erik Jensenip isumaqatgiaa, Berlingske ullumi allappoq.

Arlaata uparuartussavaatigut

- Eqqunngitsumik oqaluttuartoqarsimanera akuersaanngilluinnarparput. Taamak ilungersunartigisunik oqaaseqartoqarsimaneranik pasilliuteqartoqarsimaneranik tusagassiorfik sorliugaluartorluunniit uppernarsaatissarsiunngippat ajornartorsiutaavoq annertooq, Erik Jensen Sermitsiaq.AG-mut oqarpoq.

Erik Jensenip TV2 kaammattorpaa oqaluttuarsimasup kinaaneranik saqqummiusseqqullugu - saqqummiusseqqusineq TV-kkut aallakaatitsisarfiup itigartissimavaa. Erik Jensenip oqaatigaa, oqaaluttuarineqarsimasoq Siumumut ajornartorsiutinngorsinnaasoq, inuit attaveqaqatigiittarfiisigut partiip pasillerneqartarnera pissutigalugu:

- Qineqqusaarnerup nalaani akerleriittarsimagatta arlaata uparuartortussaavaatigut. Oqaluttuarineqarsimasorli ilisimanngilarput.

- Siumumi oqartussaaqataaneq illersortuaannassavarput. TV2-p tusarfigisimasani kinaanersoq saqqummiuttariaqarpaa, Erik Jensen oqarpoq.

TV2 qinersinermut sunniiniarsimaneranngitsoq

TV2-p nutaarsiassaqartitsiviani pisortap Ulla Porsip oqaatigaa, tusagassiisarfimmit qinersinermut sunniiniarnissaq siunertarineqarsimanngitsoq.

- Oqaluttuaq ajuusaarutigilluinnarpara. Saqqummiunneqartussaanngikkaluarpoq, taanna sapaatiummat "Presselogen" aallakaatinneqarmat oqarpoq.

- TV2-mi misissuisimanera naapertorlugu, piaaraluni kukkusoqarsimanngilaq, Ulla Pors oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER