Erinarsullaqqissoq ukioq manna misigisaqarluartoq
Paninnguaq Jensen nuusiaqqaani ”Maaniippunga” kuultimik ukioq manna nuutinnassutigaa. Ullumi Ilisimatusarfimmi ilinniagartuutut ilinniarnini aalluppaa.
Inuit ilaat inunnguutsiminnik piginnaaneqartarput, piginnaaneqarluartunullu ilaavoq Upernavimmeersoq 28-nik ukiulik Paninnguaq Jensen.
Paninnguaq qatanngutigiinni arfiniliusuni angajullersaavoq, soorunalumi aamma meeraqqaataammat ilaquttaminit arsugaavoq asaneqarluni tapersersugaallunilu.
Ajaata Nuka Heilmannip Paninnguup erinarsornermut piginnaaneqarnera mikisuusorli malugeqqaarpaa. Ajaata nipilersornermik soqutigisaqartuusup, tusaasinnaasimavaa Paninnguaq mikigaluaqaluni erinnap nipissavia eqqorlugu erinarsorsinnaasartoq.
Paninnguaq ataasiinnarmik ukioqartoq ilaqutaasa båndimut immiullugu erinarsortippaat, arfineq-marluinnarnillu ukioqarluni Upernaviup katersortarfiani inuppassuarnut sassarluni erinarsoqqaarpoq.
- Inunnit tusarnaartunit nuannarineqaqaanga pattaanneqaqalungalu, tusarnaartut ilaat qullipipput, ilaasalu inequgisorujussuuaannga. Taamanili malugisarpara Upernavimmiut assut tulluusimaarutigisaraannga, aammalumi Saattormiut (nunaqarfik Uummannap eqqaaniittoq) ataatama nunaqarfia. Avannaanut nipilersoriaraangama inuit uannut asannittaqaat, Paninnguaq oqaluttuarpoq.
Paninnguup kisimiilluni nuusiaqqaani ”Maaniippunga” ukioq manna kuultimik nuutinnassutigaa, ilisimasanik qaammaasaqarnerulernissamullu periarfissiisumik Ilisimatusarfimmi Oqaasilerineq, Atuakkialerineq Tusagassiuutilerinerlu sammillugit ilinnialerluni.
- Inuunera nipilersortartutullu isiginnittaasera taamaalilluni siammasinnerulissaaq, oqarpoq.
Apersuineq tamaat atuaruk ARNANUT nr. 74-imi, ulloq 1. decembari 2021 saqqummersumi.