Skip to main content

Erinarsugaq nutaaq kalaallisut oqaatsinik kulturikkullu kingornussanik nersorinnissutaasoq

Nipilersornermik suliniut aningaasannanniutaanngitsoq,'Small Languages Rock', nunarsuaq tamakkerlugu oqaatsit mikisut siuarsarneqarnissaannik tammatsaaliorneqarnissaannillu suliniummut atatillugu kalaallisut erinarsukkamik saqqummersitsinissamut piareerpoq.

Erinarsugaq 'Oqaatsigut/The Language Song', kalaallisut oqaatsinut qamannga pisumik nersorinnissutaasoq aamma nunarsuaq tamakkerlugu oqaatsit kulturillu tammatsiliorneqarnissaata pingaaruteqassusianik eqqaasitsissutaasoq, novembarip 8-ani saqqummersinneqassaaq.

'Oqaatsigut/The Language Song'-imi nipilersortuupput erinarsortartoq Sikkerninnguaq Møller Sørensen, Sikkitut ilisimaneqarnerusoq, nipilersoqataalu, Torbjørn Eika Jørgensen, agiarsuaq, Natalia Gordeyeva, agiaq, aamma Andreas Flensted-Jensen, noqartilik. Suliarinnittut tassaapput Yair Sapir, Malik Chemnitz aamma Christine Tongue saqqummersinneqassallunilu kalaallisut tuluttullu.

Suliniut Nunani Avannarlerni Piorsarsimassutsikkut Attaveqaammit, NAPA-mit, tapiiffigineqarsimavoq, FN-imi nunat inoqqaaviinut ukiuni qulini ukiorititamut 2022-mit 2032-mut ingerlasumut ilaalluni.

Oqaatsit 50-ikkunni ilungersunartorsiorsimasut

Erinarsugaq 'Oqaatsigut/The Language Song' nunat inoqqaavisa oqaasiisa aarlerinartorsiortut isiginiarneqarnissaannik siunertaqarpoq. Kalaallisut oqaatsivut ullumikkut aarlerinartorsiunngikkaluartut nunarsuarmi oqaatsit affaasa missingi aarlerinartorsiorput. Erinarsugaq kalaallisunut oqaatsinut nersorinnissuutaaginnanngilaq, aammali nunarsuaq tamakkerlugu nunat inoqqaavisa ikinnerussuteqartullu tamarmik oqaasiinut inunnguuseralugulu oqaatsinut tamanut nersorinnissutaalluni.

Yair Sapir, taalliortoq svenskillu oqaasiini lektori nordisk lingvistimi ph.d.-eqartoq, 'Small Languages Rock'-imik isumassarsisuusimavoq, nipilersornermik suliniummik aningaasannanniutaanngitsumik, nunarsuaq tamakkerlugu oqaatsinik mikisunik siuarsaanissamik tammatsaaliuinissamillu siunertaqartumik. Sapirip kalaallisut oqaatsivut immikkut sammillugit 'Oqaatsigut/The Language Song' suliarinneqataaffigisimavaa.

Kalaallisut oqaatsit 1950-ikkunni sanngiilliartulersimapput. Qallunaat oqaasii Kalaallit Nunaanni atuarfinni atugaanerulerput, ilaqutariillu ilaat kalaallisut oqalunnissamut taarsiullugu angerlarsimaffimminni qallunaatut oqaluttalerluni, qallunaatullu aqqit siammarsimanerulersimallutik.

Nuannaarutaassasut

Kingorna kalaallisut oqaaatsit kulturillu piujuartinneqarnissaat eqqumaffigineqarnerulerpoa kalaallisullu oqaatsit 2009-mi Kalaallit Nunaanni pisortatigoortumik oqaasituaasut akuersissutigineqarlutik. Kalaallisut oqaatsit ullumikkut aarlerinartorsiunngikkaluartut nunarsuarmi oqaatsit affaasa missingi aarlerinartorsiortutut isumaqarfigineqarput.

- Erinarsugaq manna aqqutigalugu nunat inoqqaavisa oqaasiisa kulturiisalu oqaatsillu nalinginnaasumik nunarsuarmiunut kingornussassarsiat ilaattut piujuartinneqarnissaasa qanoq pingaaruteqartiginerat isiginiarneqartikkusupparput. Tamatumalu peqatigisaanik niplersukkat tamanit nuannaarutaasinnaasut atorlugit taamaaliorluni, Yair Sapir oqarpoq.

Sikkerninnguaq Møller Sørensen suliniummi siuttuunerminik aamma nuannaarutiginnippoq, namminerminut sorpassuartigut isumaqarmat. 

- Oqaatsit mikisut uanga oqaatsittut ittut akuersaarneqarlutillu tusaaneqarnerat tupinnaannarpoq. Erinarsukkanik suliniut taanna aqqutigalugu oqaatsitigut nipilersornikkullu ineriartorsimavunga. Misigisaq nuannerluinnartuusimavoq.

Erinarsugaq 'Oqaatsigut/The Language Song' oqaatsit mikisut pillugit suliniummit, Small Languages Rockimit, suliarineqarsimavoq Nunani Avannarlerni Piorsarsimassutsikkut Attaveqaammit NAPA-mit tapiiffigineqarluni. Streamingimik kiffartuussivinni tamani novembarip 8-ani pissarsiarineqarsinnaalissaaq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER