Eriksen: Nammineq unammisarfimmi Europami pissartanngunniunnissaq eqqumiippoq

Danskit nunanut allanut unammisartuisa naatsorsuutigaat aappaagu Parkenimi Europami pissartanngunniutilerunik immikkuullarissumik misigisaqarnissartik

Ukiut tallimat matuma siornali tamanut saqqummiunneqarmat, 2020-mi Europami arsaalluni pissartanngorniunnermi Danmarkimi unammisoqatassasoq, danskit nunanut allanut unammisartuisa pissartanngorniunnermut anngunnissartik takorloorlugugulu anguniarsimavaat.

Anguniagaq ataasinngormat unnukkut Dublinimi 1-1-erlutik naligiimmata anguneqarpoq, taamalu Irland pissartanngorniunnissamut toqqaannartumik anngutinngitsoq Danmarkik Europami pissartanngorniussamut anngulluni.

Christian Eriksenip unammersuarnissaq qilanaaraa, tassani unammisartoqatini peqatigalugit Parkenimi minnerpaamik marloriarlutik unammisissaapput.

- Nammineq unammisarfimmi Europami pissartanngorniulluni unamminissaq eqqumiissaaq.

- Pissartanngorniunnissamut anngutinngitsoorsimagutta misigisaq oqimaassimassagaluarpoq. Uagut peqataanata nunat allat Danmarkimi pissartanngorniullutik unammisut isiginnaarniarlugit oqimaassagaluaqaaq.

- Taamaammat anngukkatta oqiliallannaqaaq, uagutsinnut danskinullu illersuisutsinnut tamanut nuannissaqaaq, Christian Eriksen oqarpoq.

Kasper Schmeichelip ataasinngormat unammineq suli aallartinngitsoq pingaartillugu oqaatigaa, nammineq unammisarfimmi Europami pissartanngorniunneq immikkut ittumik misigisassaassasoq, siusinnerusukkut arsaallammassuartut tusaamasat misigissallugu periarfissaqarfigisimanngisaat. Europami pissartanngorniunnissamut annguttoqarmat målmandi suli nuannaarneruvoq.

- Isumaqarpunga, danskit tamarmik unammersuartoqarnerani nammineq unammisarfimmi unammisinnaaneq takorloortarsimagaat. Maanna tamanna periarfissaalerpoq, tamattalu qilanaartupilussuuvugut, chmeichel oqarpoq.

Mathias "Zanka" Jørgensen Europami pissartanngorniulluni unamminermini najugaqarfik ilisarisimalluakkani najorlugu unammisassaaq.

- Inunngorfinniit alliartorfinniillu minutsinik tallimanik ungasitsigisumi unammisassaanga. Tassani inuunerma annersaa arsaattarsimavunga. Piumaguma unammereernermi sikkilerlunga minutsit tallimat atorlugit anaanannukartarsinnaavunga.

- Danmarkimi Europami pissartanngorniuttoqarnissaa tamatsinnut annertuumik kajumissuseqartitsisimavoq. Peqataanata isiginnaaginnarniartuugutta annernarsimassagaluaqaaq, kinguarsimasutut unammisartoq oqarpoq.

Aamma Esbjergimiu Martin Braithwaite danskit illersuisartui isiginnaartoralugit unammisarnissamut qilanaarpoq, pissanngatigaali nammineq unammisarfimmi unammersuarnissaq takorluugaannaajunnaarpat misigisaq qanorpiaq issanersoq.

- Uppernarpianngilarluunniit, uppernarpianngilaq. Danmarkimi Europami pissartanngorniunnissaq takorlooruminaappoq, isumaqarpungalu tamanna misigitinnagu qanoq annertutiginersoq paasineqarnavianngitsoq, ataasinngormat isertitsisoq oqarpoq.

Danmark Parkenimi marloriarluni pingasoriarluniluuunniit unammissanersoq makitsisoqarnerani paasinarsissaaq. Danmark makitsinermi ajorsarpat, nunanut allanut unammisartut gruppekampit Sankt Petersborgimi ingerlatissavaat, gruppikkaarlunimi unamminerit tamarmik Danmarkimi Ruslandimilu ingerlanneqartussaapput.

Powered by Labrador CMS