Erik nalunaaruteqarpoq: Kangerlussuaq mittarfissuaqarfittut attakkusukkaa
Kangerlussuaq ilaasunut mittarfissuaqarfittut ingerlaannassasoq Naalakkersuisut anguniarpaat, kisianni aningaasaqarnera pillugu inatsit suli inissinneqanngilaq, attaveqarnermut naalakkersuisoq oqarpoq.
Kangerlussuup siunissaa pillugu Naalakkersuisut naluaaruteqarnissaminnut tunuarsimaarput, nunaqarfimmi mittarfiup ingerlanneqarnissaanut Danmark suli isumaqatigiissusiorfigineqanngimmat.
Kangerlussuarmi innuttaasut siunissaq pillugu nalornisinneqarneranni Naalakkersuisut isornartorsiorneqareersullu, naalakkersuisoq Erik Jensen (S) Sermitsiaq.AG-mut oqarpoq.
Danmarkimi illersornissamut ministereqarfiup nunaqarfimmi mittarfiup sakkutooqarfiunissaanik kissaaneqarnera, TV2-p oqaluttuarinerata kingorna isornartorsiuineq sakkortuseqqippoq.
Illersornissaqarfiup kissaataa ukiorpassuani ilisimaneqareersoq, Pele Broberg (N) tassunga atatillugu oqarpoq, mittarfiullu ullumikkut Kalaallit Nunaannut nunanit tamalaanit silaannakkut angallannerup annerpaartaanut isaaviusup, siunissaa qanoq innersoq Naalakkersuisut ersarissumik nalunaarutigisariaqaraat.
Kangerlussuaq suli ilaasunut mittarfiussaaq
Erik Jensenip illersornissaqarfiup kissaatai pillugit allakkiaq oqaaseqarfigerusunngilaa. Naalakkersuisut kissaataannut naleqquttumik, Kangerlussuup siunissaa pillugu Danmarkimi naalakkersuisunut isumaqatigiissusiornissaq pingaarnerpaavoq, taanna oqarpoq.
Kangerlussuaq sakkutuujunngitsunut mittarfittut ingerlaannassasoq, Naalakkersuisut anguniagarigaa, Erik Jensen ilisimatitsivoq, aamma Nuummi Ilulissanilu pilersaarutit malillugit 2024-mi mittarfissuit ammareernerisa kingorna.
- Anguniagarput annertooq taannaavoq, Erik Jensen oqarpoq.
Mittarfiup nunatta iluani angallattunut appartinneqarnissaanik, Naalakkersuisut pilersaaruteqarnerarneqarnerat taamaalilluni ilumuunnginnerarpaa.
Aningaasanut inatsimmi maannamut Kangerlussuup nunatta iluani angallattunut mittarfittut 2025-mit ingerlasussanngorlugu, aningaasanik immikkoortitsisoqarpoq. Kisianni mittarfissuartut ingerlaannarnissaanut Danmark isumaqatigiissusiorfigineqarsinnaanissaa, Erik Jensenip neriuutigaa. Kangerlussuaq mittarfissuartut ingerlaannassappat saniatigut 53 mio. kr.-nik akeqassasoq Naalakkersuisut naatsorsornikuuaat.
Nutaarsiassaateqarnani tikikkusunngitsoq
Erik Jensen 2023-p aallartinnerani Kangerlussuarmi innuttaasunik ataatsimiititsiniarluni siornatigut oqarnikuuvoq. Danskit naalakkersuinik isumaqatigiissuteqartoqarnissaa utaqqineqartariaqartoq maanna oqarpoq, tamanna ilaatigut folketingimut qinersisoqarnera pissutigalugu kinguaattoornikuuvoq:
- Nutaarsiassaateqarnanga Kangerlussualiarnissara innuttaasut kissaatiginngilaat. Innuttaasut ersarissumik nalunaarfigineqarnissartik kissaatigaat.
- Isumaqatigiissutit taakku utaqqivagut, taamaalilluta qanoq pisoqassanersoq ersarissumik nalunaarutigisinnaagatsigu, Erik Jensen oqarpoq, nangillunilu:
- Nunap immikkoortuani tassani najugaqarpunga, taamaattumik qanoq pingaaruteqartiginersoq nalunngilara, pitsaasumillu isumaqatigiissusiornissaq anguniarpara.
Kangerlussuaq pillugu qaqugu isumaqatigiittoqassanersoq, Erik Jensenip oqaatigisinnaanngilaa, taamaattumillu Kangerlussuarmi innuttaasut 500-t missaanniittut siunissamut pilersaarutit pillugit nalunaarfigineqarnissartik utaqqilaartariaqarpaaat.