Erik Jensen: Taamaammat Aleqa Hammond utertipparput
Siumup siulersuisuuneri aalajangersimapput siornatigut taaguunneqarluartartoq Aleqa Hammond partiimut uterteqqinniarlugu. - Nukinnnik nutaanik katersuutsitsinissatsinnut piffissanngorpoq, Siumup siulittaasua Erik Jensen oqarpoq.
Aleqa Hammondip Erik Jensen Siumullu siulersuisuuneri saaffiginnereersullu, partiitoqqaminut uteqqinnissani toqqarsimavaa. Erik Jensenip Aleqa Hammond tikilluaqquaa, Aleqa Hammondillu tungaanit pisortat aningaasaataannik atornerluisoqaqqinnissaa imaluunniit partiimut ajoqutaasumik suliaqartoqarnissaa ernummatiginnginnerarlugu.
- Aleqa Hammond politikeriuvoq pikkorissoq misilittagartoorlu. Qangaanerusoq pisimasut eqqarsaatigerusunngilakka. Siornatigut kukkusimanerit ilinniarfigisinnaanngikkutsigit ingerlariaqqillutalu sumut atussagatsigit, Erik Jensen Sermitsiaq.AG-mut oqarpoq.
Suliaq ilungersunartoq partiimillu anisitaaneq
Aleqa Hammond partiip siulersuisuunerinit 2016-imi anisitaavoq pisortat aningaasaataannik arlaleriarluni atornerluisarsimanera saqqummiunneqareersorlu.
Taamani Siumup siulittaasuata anisitsineq ima nassuiarpaa:
- Siulersuisuunerit Aleqa Hammondip iliuusai akuerisinnaanngilaat. Sulianit arlaleriarluni pisimasunit partiip tatiginassusia innarlerneqarujussuarpoq. Aningaasat amerlassusaat pineqanngillat, kisianni Aleqa Hammondip aningaasaqarnerminik aqutsiniarnermini ajornartorsiuteqarnermini siullermiilinnginnera pineqarpoq, Kim tusagassiuutitigut nalunaarummi erseqqissaavoq.
Partii siusinnerusukkut ilaasortaajunnaarsitsisimagaluartoq ullumikkut siulittaasuusup Erik Jensenip Aleqa Hammondip ilaasortaajunnaarsinneqarsimanera ilumuunnginnerarpaa.
- Nammineq partiimit tunuarpoq, taamaattumik ilaasortaajunnaarsinneqarsimanera tusarsimanngilara, siulittaasoq oqarpoq nangillunilu:
- Partiitut ataatsimoortutut inissisimagutta nukittunerussaagut, innuttaasunit nukimmik pisariaqartitsivugut, namminiilivikkiartuaartussanngoratta, Erik Jensen nassuiaavoq.
Aleqa Hammond ukiuni marlunni attaviitsooreerluni Nunatta Qitornai sinnerlugit 2018-imi Inatsisartunut qinigassanngortippoq, tamatumanilu 171-init taaguunneqarluni, tamannalu ilaasortanngornissaanut naammannani, partiimi inissaq pissarsiarineqartoq ataaseq siulittaasumit Vittus Qujaukitsumit pissarsiarineqarmat.
Ukioq manna apriilimi qinersinermi inuttut siuariaraluarluni Aleqa Hammond aamma Nunatta Qitornai Inatsisartunut ilaasortanngortitsinissamut naammattunik taaguunneqanngillat. Aleqa Hammond inuttut 271-init taaneqarpoq.
Aleqa Hammond siornatigut Siumumut taasinerpassuarnik qulakkeerinnittarsimavoq, assersuutigalugu 2015-imi Folketingimut qinersinermi, tassani 3.759-init taaneqarluni Atlantikullu Avannaaneersunut inissat aappaannik pissarsilluni.