Erik Jensen: Siumut assigiimmik oqariartuuteqartassaaq
Politikkikkut suliassat anginerusut eqqarsaatigalugit Siumumi ilaasortat qularnaatsumik assigiimmik oqariartuuteqartassapput. Partiip siulittaasuata Erik Jensenip tamanna kissaatigaa.
Avissaartuunneq inunnullu ataasiakkaanut tunngassuteqartut suliat Siumumut ilisarnaataassanngillat.
Partiili nunatsinni politikkikkut sulianut anginerusunut tunngatillugu assigiimmik oqariartuuteqartassaaq.
Partiip siulittaasua Erik Jensen taama kissaateqarpoq. Taassuma Inatsisartuni ilaasortat, kommunini ataatsimiititaliani gruppini siulittaasut, folketingimi ilaasortat borgmesterilu Qooqquni isumasioqatigiinnissamut qaaqquai.
- Siumumit suliani annertuuni assigiimmik isumalimmik oqariartuuteqartassaagut. Soorlu attaveqaasiornermi suliniutini angisuuni, aatsitassarsiornermut, namminiilivinnissamut oqaatsinullu tunngasuni, Erik Jensen Sermitsiaq.AG-mut oqarpoq tunngavilersuillunilu:
- Qinersisartut qularissanngilaat Siumut assigiimmik oqariartuuteqartoq, tatigissallugulu partii suliani angisuuni ataatsimoortumik suliaqartoq.
Inunnut ataasiakkaanut suliat initusut
Erik Jensen, partiip ataatsimeersuarnerani kingullermi novemberimi 2020-mi siulittaasunngortup, oqaatigaa avissaartuunneq inunnullu ataasiakkaanut suliat ukiuni kingullerni initusimasut.
- Tamanna nassuerutigalugu, immitsinnut qiviarluta ingerlaqqittariaqarpugut partiimi isumaqatigiissutit suliniutit ersarissarlugit. Partiimit sulianut tunngassuteqartut ataatsimoorfigisagut aallutissallugit oqariartuutigineqareerpoq, tamannalu ingerlatissavarput, Erik Jensen oqarpoq.
Assigiinngisitaarneq inissaqarpoq
Taassuma erseqqissarpaa partiimi isummat assigiinngitsut soorunami suli inissaqartut. Qinigaaffimmi maanna atuuttumi Siumut Inatsisartuni kommuninilu arlalinni partiini illuatungiliuttuni anginersaavoq.
Erik Jensenip erseqqissarpaa pingaartumik kommuninut tunngatillugu isummat assigiinngitsut inissaqartuassasut.
- Nunarput isorartoorujussuuvoq, inuussutissarsiutigineqartullu taamatulli assigiinngiiaartigaat. Taamaattumik partiimi isummernerit assigiinngitsut tassani soorunami inissaqarput. Sulianili angisuuni assigiimmik oqariartuuteqartarnissaq sulissutigissavarput, Erik Jensen oqarpoq.
Siumup qinigaatitai Qooqquni 18.-22. september isumasioqatigiissapput.