Erik Jensen: Siumup ataatsimoornera qularutigineqassanngilaq
Piffissami sivitsortumi Siumut sinnerlugu politikerit assigiinngitsunik sammiveqartunik oqariartuuteqartarnerat paatsuungatitsivoq. Taamaattorli partiip siulittaasua Erik Jensen erseqqissaavoq Siumut sinnerlugu sassartussat ataatsimooqqissaassasut.
Siumut parteerujussuummat sinerissami inoqarfinni tamangajanni immikkoortortaqarfeqartoq, taamaammat ataqatigiissaarineq annertooq ingerlanneqartoq, partiip siulittaasua, Erik Jensen ataasinngormat partiip qullersaqarfianut pulaaratsigu Sermitsiamut oqaluttuarpoq.
Ilanngullugu oqaatigaa qineqqusaarnermut atatillugu atortussat nassiussorneqarsimalereersut maannalu kommunalbestyrelsinut, nunaqarfinni aqutsisunut aammalu Inatsisartunut partiip ataatsimoortumik qineqqusaarutai piareerluinnalersut.
Partii ataatsimoortoq
Piffissami sivitsortumi Siumup iluani aalassassimaartoqarpoq, ilaatigut apeqqutinik pingaarutilinni politikkikkut sammivia ataasiinnaanngitsutut isikkoqartarluni.
Erik Jensen aperaarput qularnaatsumik oqaatigisinnaaaneraa partiip qinersinernut sassartitai ataatsimoortut aammalu qinersereernerup kingorna ataatsimuussasut:
- Siumut ataatsimoorpoq, tamanna qularutigineqassanngilaq. Avissaartuunneraaneq tusagaassiortunit assigiinngitsunillu uteqattaarneqarpoq. Kisianni uagut Siumumi siulersuisuunerit aammalu Inatsisartuni gruppi, tassani ilaapput Inatsisartuni ilaasortat Naalakkersuisullu, tamaavitta ataatsimoornerput qularutigineqassanngitsoq qanittukkut tusagassiutitigut nalunaarutigaarput, aviisimut Sermitsiamut ilaatigut oqarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: