Erik Jensen: Qinersisoqassanngilaq
Erik Jensen Aalisarnermut Piniarnermullu Naalakkrsuisumut tatiginnikkunnaarsimagaluarluni, Jens Immanuelsenimut tatiginnikkunnaarluni taasititsinissamut taperseerusunngilaq. Tamatumami kinguneranik Kim Kielsen qinersisoqarnissaanik nalunaaruteqartariaqassammat, tamannalu suli piffissanngunngiilaq, Erik Jensen oqarpoq.
Inatsisissatut siunnersuummut isumaliutissiissummi Naalakkersuisup sakkortuumik isornartorsiorneqarnerata malitsigisaanik, pingasunngormat Aalisarnermut, Piniarnermut Nunalerinermullu Naalakkersuisumut Jens Immanuelsenimut tatiginnikkunnaarluni saqqummiussisoqarpoq, tamannali Siumumit, Nunatta Qitornaanit Demokraatinillu pinngitsoortinneqarpoq.
Tamanna pivoq naak, Siumumi ilaasortat arlallit Naalakkersuisup piniarneq aallaaniarnerlu pillugit inatsisissatut siunnersuummik suliaqarsimaneranik sakkortuumik isornartorsiuinermut atsioqataasimagaluartut.
Taasititsisoqarnissaa sioqqullugu, taasititsisoqarnerani tamatumalu kingorna oqallinnermi, inersuarmi oqaluttarfimmit oqaatsit sakkortuut atorneqarput, sioorasaarisoqarsimaneraasoqarpq, Inatsisartullu sulinerannut akuliuttoqarneraasoqarluni.
- Oqaatsit sakkortullutillu qaqutigoorluinnartuupput. Ulloq takisimaqaaq, Aalisarnermut, Piniarnermut Nunalerinermullu Ataatsimiititaliami ilaasortaq Erik Jensen (S) Sermitsiaq. AG-mut oqarpoq.
Naalakkersuisumut tatiginnikkunnaarsimasoq
Isumaliutissiissummi Naalakkersuisumut sakkortuumik isornartorsiuisumut atsioqataasimavoq.
- Ataatsimiititaliaq isumaqatigiittoq atsiorsimavoq. Inatsisissamut missingiut ingerlatsinerlu sakkortuumik isornartorsiorparput. Suliaq naammaginanngilluinnarpoq, Erik Jensen oqarpoq.
Taassuma erseqqissaatigsaa, suliaq tamarmi suleqatigiinnermut ajoqutaasimasoq.
-Suliap ingerlanneqarnerani Jens Immanuelsenimut tatiginninnera ajoquserneqarpoq. Isumalutissiissummi tamanna allassimavoq, tamannalumi isumaqatigiissutigaarput. Suliaq naammaginanngilluinnarpoq, taanna oqarpoq.
Erik Jensen Naalakkersuisumut tatiginnikkunnaarsimagaluarni, Jens Immanuelsenip Naalakkersuisuujunnaarneranik kinguneqarsinnaasumik, tatiginninnginnermik taasitsitsisoqarmat, naalakkersuisumut annaassisut ilagaat. Tunngaviusoq tassaasimavoq, Erik Jensenip piffissaanngitsukkut qinersisoqarsinnaaneranik pinngitsuuiniarsimanera. Taasisitsisoqannginnissaanik taasisoqanngitsiartoq Henrik Fleischer peqatigalugu Kim Kielsenimik oqaloqateqarsimapput. Tassani kinguneqaataasinnaasut oqaluuserineqarsimallutik, Erik Jensen oqaluttuarpoq.
Qinersisoqartariaqarsimassagaluartoq
-Periarfissat assigiinngitsut eqqartorsimavavu.Qinersisoqartariaqarnera sioorasaarutaanngilaq, taamaattoqarnissaanik paasinninneruvoq. Tamatuma malitsigisaanik qinersisariaqartussaassaagut, tamannalu coronamik ajornartorsiuteqarnitsinni pitsaanngilluinnarpoq, Erik Jensen oqarpoq.
Siumumi siulittaasunngorniunnissamut pissaaneqarniunnermut tamanna ilaannginnerarpaa.
- Politikkimi naapeqatigiittoqartartussaavoq. Ilaannikkut akueriuminaakkaluartoq naammagiinnartariaqartarput. Piumasap pineqarnissaa pineqartanngilaq, aamma nunamut innuttaasunullu pitsaanerpaamik suleqatigiinnissaq aaqqiissutissarsiornissarlu pineqartarput. Piffissanngorpoq ataatsimoornissarput. Pingaartumik massakkut coronap ajornartorsiortitsinerani, Erik Jensen naggasiivoq.