Erik Jensen: Partii innuttaasullu ataatsimoortissinnaavakka

Erik Jensen Siumumi siulittaasunngorniarnermini suleqatissarsiorsinnaasutut aaqqiissutissarsiorsinnaasutullu arlaleriarluni oqaaseqartarpoq.

Siumumeersut allat arfinillit peqatigalugit aasaq Kim Kielsenimut tatiginnikkunnaarlutik nalunaaruteqarsimagaluarluni, Kim Kielsen inuttut isornartorsiorusunngilaa.

- Nukikka allanik nakkarsaanermut appisaluussinermullu atorusunngilakka, nukikka innuttaasut nunallu iluaqutissaanut atorusuppakka, Sermitsiaq.AG-mut oqarpoq, apersorneqarnerminilu tamanna arlaleriarlugu oqaatigisarpaa.

Inuiaqatigiit naapeqatigiissinneqarnissaat

Qanorli iliorniarnera tusarlugu partiimi maanna aqutsisunut tunngatillugu suna ajornartorsiutigineraa tusaanngitsuusaaruminaappoq.

- Ammasumik unneqqarissumillu aqutseriaaseqarnissaq, nunamik innuttaasunillu ataatsimoortitsisinnaasoq aamma partiimi ilaasortanik ataatsimoortitsisinnaasoq anguniarpara. Siulittaasunngoruma tamanna angussallugu neriorsuutigisinnaavara, siulittaasunngorniarnermini imminut upperilluinnartoq oqarpoq.

Uteqattaartuarpaa tamat suleqatigiinnissaannik pingaartitsinini.

- Katersuuffiorusuppunga pisariaqarluinnartumik inuiaqatigiinnik naapeqatigiissitsisinnaasoq.

- Naalakkersuisuuffigisimasanni tamanna uppernarsarsimavara, tassa susassaqarfiit arlallit piffissap sivikitsuinnaap iluani naalakkersuisuuffigisimavakka suliassallu tamaasa naammassisimallugit.

Talerperliuvallaalersimaneq

Erik Jensen 2017-imi Kim Kielsenimit kommuninut, nunaqarfinnut, avinngarussimasunut, attaveqaatinut ineqarnermullu naalakkersuisunngortinneqarpoq. Kingusinnerusukkut aalisarnermut piniarnermullu naalakkersuisunngorpoq, kingullermillu aatsitassanut suliffeqarnermullu naalakkersuisuulluni novembarip qaammataani Naalakkersuisunit tunuarnissami tungaanut.

- Taamaammat najukkamik pingaartitsisuunngilanga najukkamiluunniit politikkeriunanga. Nuna tamakkerlugu politikki kisiat ingerlassimavara, taamaallaallu ulluni tretteniniit fjorteninut najukkami politikkeriusimallunga. Taamaammat isornartorsiutaasoq ilisarisinnaanngilara.

Siumumi aqutseriaaseq kisiat pinnagu, aammali politikkerineqartoq Erik Jensenip allanngortikkusuppaa.

- Ullumikkut nassuerutigisariaqarparput talerperlermut sanguallaarsimalluta, saamerliunerusutut partiinngoqqittariaqarpugut, Kalaallit Nunaanni politikkeqarnermi qeqqanut inissilluta.

- Innutaasut Siumut siusinnerusukkut tatigisarsimasartik tarrarsorfigisinnaasarsimasartillu maqaasivaat. Tatiginninneq taanna pilerseqqissavarput. Siulittaasunngoruma qineqqusaarnitsinni anguniakkat qulakkeerneqarnissaannut nukikka atussuakka.

- Assersuutigalugu Siumup pingaartillugit qineqqusarutigisimavai ullumikkut illoqarfinni ikittuinnarni sanaartorneq siammarlugu allani sanaartortoqarnissaa. Aalisarnerup inunnit amerlanerusunit ingerlanneqarnissaa ilanngullugu.

Kim Kielsenimut tatiginnikkunnaarneq

Nammineq piginnaasani pillugit oqaaseqaraangami peqatigiiffilerinermi sungiusaasutullu misilittakkani innersuussutigisarpai. Suleqatigiilluarsinnaasunik pilersitsisinnaasutut imminut isigivoq. Siornali suleqatigiinnik malunnaatilimmik eqqissiviilliortitseqataavoq.

- Ukiasssaq allat peqatigalugit Kim Kielsenimut tatiginnikkunnaarlusi nalunaaruteqarassi aaqqiagiinngissuteqalersitseqataavutit. Isumaqarpit avissaartuuttoqareersoq partii ataatsimoorteqqilersinnaallugu?

- Partiimi ileqqoreqqusat taamanikkut malippavut, partiimullu tamatta unneqqarissuulluta. Taamaammat partiimi kinguaariit nikinnissaat pisariaqartinneqartoq anguniarlugu aqqutissat eqqortut atorsimavavut, nunalu tamakkerlugu ataatsimeersuarnissamut tamanna utaqqissullugu. Ilaasortalli ataasiakkaat namminneq aalajangiisussaapput.

- Aamma tamatumunnga tunngatillugu inuppassuit inuit attaveqaqatigiittarfiisigut allatut aqutseriaaseqarnissamik kissaateqartut nammineq takusinnaavara, kissaataallu ilisarisinnaallugu.

- Taamaammat imminut qiviarnissaq, taamatullu suliaqarusunnerluni imminut aperinissaq pingaaruteqarpoq, innuttaasullu pisariaqartumik tatiginneqqilersinneqarnissaat akisussaaffittut tigorusuppara.

- Kim Kielsen siulittaasutut qinigassanngorteqqinniarpasippoq, septembarillu qaammataani immikkoortortaqarfiit amerlanerussuteqartut Kim Kielsenip siulittaasutut ingerlaannarnissaanik tatiginnillutik nalunaaruteqarput. Najukkani peqatigiiffiit amerlanerussuteqartut qanoq ilillutit qularunnaarsissinnaavigit illit siulittaasusinnaasutit?

- Najukkani immikkoortortaqarfiit qisuariaataat, eqqortumik periuseqartoqarnissaanik kissaateqarnerusutut paasivara. Nuna tamakkerlugu ataatsimeersuarnissamut ukioq ataasiujunnaarpoq. Aamma nuna tamakkerlugu ataatsimeersuarneq akisoqalunilu ataqatigiissaarniarneqartarnera sulinartupilussuusarpoq, taamaammallu eqqortumik pilersaarusiorneqartariaqarluni. Taamaammat ileqqoreqqusat malippavut partiimullu unneqqarissorujussuulluta, najukkani immikkoortortaqarfiit nalunaarutaat tusaatissatut tiguarput, nunalu tamakkerlugu ataatsimeersuarnissamut tamanna utaqqissunniarlugu aalajangersimalluta, nuna tamakkerlugu ataatsimeersuarnermi pisariaqartinneqartumik kinguaariit nikiffigisinnaasaat.

Ullaaq arfineq-pinasunut tanneq qulit Erik Jensenip Siumut partiitut qiterlertut isigalugu erseqqissaatigaa.