Erik Jensen: Nalunaaruteqartarnikkut oqaloqatigiittarnikkullu unammilleqatigiinneq innarlernaveersaarneqartarpoq

Naalakkersuisup oqaatiga, ilaasunik angallassinermi kiffartuussinissamik isumaqatigiissutinit aningaasat pissarsiarineqartut takornariartitsisartut unammilleqatigiinnerannut atorneqannginnissaat Namminersorlutik Oqartussanit nakkutigineqartartoq.

Erik Jensenip oqaluttuaraa, kiffartuussinissamik isumaqatigiissutini piumasaqaataasoq, niunermi sulianut aningaasat atorneqannginnissaasa qulakkeerneqarnissaa.

Takornariartitsisartup kommunimilu pisortap Nick Nielsenip Disko Line Naalakkersuisullu isornartorsiorsimavai. Nick Nielsenimmi Naalakkersuisut ilaasunik angallassinermi kiffartuussinissamik isumaqatigiissutit aqqutigalugit Disko Linemut tapersersunermikkut, takornarianik imaatigut angallassinermi unammilleqatigiinnermut innarleeqataasut.

- Disko Line takornarianik ulikkaarluni ilaasulik Ilulissat Kangianiittoq takugaangakku, eqqarsartarpunga Namminersorlutik Oqartussat Disko Line aqqutigalugu takornariartitsisartuaqqanut unammillerlunilu nukillaartitsiniarsarisoq, Nick Nielsen ilaatigut taamatu isornartorsiuivoq.

Naalakkersuisoq Erik Jensen (S) isornartorsiuineq pillugu oqaaseqarnermini oqarpoq, Namminersorlutik Oqartussat inuussutissarsiutinik ingerlatsinermut tapiissutaasa inuinnartullu nammineq suliaqarusussutsimut atugassarititaasut pitsaasut akornanni oqimaaqatigiittoqarnissaa eqqumaffigisarlugu.

Taamatullu oqimaatigiissitsisarneq ilaasunik angallasinermi kiffartuussinissamut isumaqatigiissusiornermi eqqarsaatigineqartartoq. Erik Jensen Sermitsiaq.AG-mut mailikkut taamatut allappoq.

Kiffartuussinissamik isumaqatigiissutini piumasaqaatitaqartoq

Erik Jensenip oqaatigaa, kiffartuussinissamik isumaqatigiissutini piumasaqaataasoq, tapiissutit suliffeqarfiit pissarsiarisaat niuernermi sulianut atorneqannginnissaat.

- Naalakkersuisut kiffartuussinissamik isumaqatigiissuteqarfigineqartut niuernikkut suliaannut tapiissutit atorneqartannginnissaasa qulakkeerneqarnissaa eqqumaffigisarpaat. Tamanna pisarpoq ingerlatsisut qaammatit pingasukkaarlugit nalunaarusiortarnerisigut oqaloqatigisarnerisigullu, Erik Jensenip akissutaani allassimavoq.

Erik Jensenip akissummini erseqqissaassutigaa, attaviit aalajangersimasut akigititallu naammaginartut qulakkeerneqartariaqaraangata taamaallaat tapiissuteqartoqartartoq:

- Aalajangersimasumik tikiffigineqarneq ajortunut ilaasunik angallassinerinnarmut tapiissuteqartoqartarpoq, tassa tikiffigineqarpiarneq ajortunukartarnermi bilitsit akii qaffasippallaarsinnaammata imaluunniit angallassinermi aaqqissuussap patajaattup aamma ukioq naallugu - angalarusuttunut sulisussaqarniarnerup ataqatigiinnissaat eqqarsaatigalugit, Erik Jeneip akissutaani ilaatigut allassimavoq.

Disko Linemit tapiissutit taamatut atorneqartanngittut oqaatigineqartoq

Erik Jensenip oqaatigaa, Diskor Linemik, Air Greenlandimik, Norlandairimik aamma Arctic Umiaq Linemik kiffartuussinissamut isumaqatigiissutini tamana taamatut eqqarsaatiginnittarneq atuuttoq.

Disko Linemi pisortap Noelle Simoudip oqaatigaa, kiffartuussinissamik isumaqatigiissutinut aningaasaliussat unammilleqatigiinnermik innarliiniarluni atorneqarneq ajortut:

- Kiffartuussinissamik isumaqatigiissutit naatsorsorneqarneranni kiffartuussinissamik isumaqatigiissummi ingerlatsinermut aningaasartuutaannaat ilanngunneqartarput, pisortaq oqarpoq.

Powered by Labrador CMS