Erik Jensen: Kalaallit Nunaanni aatsitassanut tunngatillugu iluatsitsilluarneq
Nunarsuarmi aatsitassarsioqatigiiffiit annersaasa ilaat, Rio Tinto, Qaanaap kujataani titaniumimut suliniummut suleqatigiinnissamik isumaqatigiissuteqarniarluni aalajangernera silarsuup sinneranut takussutissaavoq pingaarutilik, Aatsitassanut Naalakkersuisoq Erik Jensen taama naliliivoq.
Nunani tamalaani ingerlatseqatigiiffik aatsitassarsiornermik suliaqartoq ilaatigut Moriusami aatsitassamik titaniumitalimmik ilmenit-imik piiaassaaq.
- Ilanngunnerat tamanna pingaartumik uissuumminartuussaaq, Aatsitassanut Naalakkersuisoq Erik Jensen taama naqissusiivoq.
- Tamanna Kalaallit Nunaannut nutaarsiassaavoq pitsaasoq. Nunarpummi aatsitassarsiorfittut pingaarutilittut akuerisaassavoq, Erik Jensen oqarpoq, Namminersorlutillu Oqartussat nunatta isertitaqarnerunissaanut periusissaanut innersuussivoq, aalisarneriinnaq kisiat akissarsiorfiginnginniassavarput. Tamatumuuna aatsitassarsiorneq takornariaqartitsinerlu ilanngullugit ilaatigut naatsorsuutigineqarput.
Suliniutit amerlanerusut neriuutigai
Aatsitassarsioqatigiiffissuit Kalaallit Nunaanni aatsitassarpassuaqartoq paasiartulerumaaraat, suliniutit amerlanerit aallartinneqarnerussammata, neriuutigaa.
Qaanaap eqqaani suliniut Dundasi neriulluarnartupiluuvoq, titaniumitalimmimmi ilmenit-imik annertuumik nassaassaasoqarnera peqassusaalu annertummat. Saniatigut piiaaneq ajornanngilaq, Qaanaammi kujataani Moriusap sineriaani 30 kilometerinik isorartutigisumi sissami qullarnikumi sioqqani assaannartoqartussaavoq.
Suliarinninneq Moriusami suliaqarfimmi nunamiittumi oqimaassusilinnik magneteqartunillu avissaartuussinikkut pissaaq.
Innuttaasunut annertuumik pingaaruteqartoq
- Innuttaasunut annertuumik pingaaruteqartussaassaaq, Erik Jensen naqissusiivoq, erseqqissarpaalu suut tamarmik malittarisassat malillugit ingerlanneqarnissaat inatsisip qularnaassagaa.
Rio Tinto ukiut arlaqanngitsut matuma siorna arlaleriarluni piiaasarsimavoq, kisianni Australiamiut Kalaallit Nunaanni aatsitassanik saviminernilluunniit piiaanermi iluatsitsinikuusimanngillat.