Erik Jensen: Isumaqatigiinniarnerit ukiuunerani ataatsimiinnermi nanginneqassapput
Siumup siulittaasua, Erik Jensen Sisimiunut utereerpoq naalakkersuisooqatigiinnissamut isumaqatigiissut nutaaq suli inissinneqanngitsoq. Isumaqatigiinniarnerit unitsinneqarallarput, Jensen-illi naatsorsuutigaa Inatsisartut februarimi ukiuunerani ataatsimiinnissaminnut katersuuppata nangeqqinneqassasut
Qaammatit marlungajaat matuma siorna nunatsinni partiit annersaat Siumut ataatsimeersuarmat siulersuisuunernillu nutaarluinnarnik qinersisoqarmat, tassanilu Erik Jensen Kim Kielsen-imut 39-32-mik ajugaalluni siulittaasunngormat, aviisi Sermitsiaq taama allappoq.
Taamanili innuttaasut, inuussutissarsiuteqartut, kommunit, Inatsisartut nunanilu allani malinnaasut utaqqilerput nunatta aqunneqarnerata nutaamik ilusiligaanissaa pillugu paasitinneqarnissaminnik, sulili utaqqisoqartariaqarpasippoq.
Taamaattorli nalunngilarput Erik Jensen-ip siulersuisoqataasalu kissaatigigaat demokraatit Nunattalu Qitornai peqatigalugit naalakkersuisooqatigiit ingerlaannassasut, aammalu Erik Jensen-ip naatsorsuutigigaa Naalakkersuisut siulittaasuattut, Kim Kielsen taarserlugu inississalluni aammalu nutaanik naalakkersuisussanik toqqaassalluni, taamaammallu naalakkersuisooqatigisat isumaqatigiinniaqatigineqartut Siumup siulersortaavinit. Taamaattorli suli ersarissuliortoqanngimmat isumaqatigiissutinik peqarsimanissaa ilimatsaattariaqarluni:
– Isumaqatigiinniarnerit pillugit aalajangiisuusumik nutaarsiassanik soqanngikkallarpugut, taamaattorli oqarsinnaavunga pitsaasumik torersumillu isumaqatigiinniarnerit ingerlammata, isumaqarpungalu nangittariaqartut, Inatsisartut katersuuteqqippata. Taamatuttaaq Siumumi ilutsinni suliaqarpugut naammasseqqaartariaqakkatsinnik kiisalu anguniakkagut nutartikkat avammut saqqummiunneqarnissaminnut piariilivipput, Erik Jensen (S) Sermitsiamut oqarpoq, taassumali oqaluttuarinngilaa iluminni suliassat aaqqinneqaqqaartariaqartut suunersut.
Isumaqatigiissummut nutaamut Siumup piumasaqaatai
Erik Jensen siulersuisoqatigiligaalu Siumup ataatsimeersuarnerani Kim Kielsen-imut ataatsimeersuarnerup siuliani suliakkiutigineqarsimasut assingajaanik suliakkinneqarput, suliassalli nutarterneqarput nutaanillu ilanngussisoqarluni. Taamaattorli partiip anguniagaasa nutartikkat suliarineqarnerat naatsorsuutigisamit sivisuneruvoq, taamaammallu anguniakkat nutartikkat tamanut suli saqqummiunneqanngillat.
Aviisimi Sermitsiami atuanerusinnaavutit. Aviisi uani pissarsiariuk: