Erik Jensenip Siumut Nuuk naveerpaa: Sumiiffissinni politikkikkut sulissutiginnilerniaritsi

Siumup siulittaasuata Siumut Nuuk avoqqaarinnissutissarsiuinnavittutut pissusilersortoq qatsulluinnarpaa. Maanna immikkoortortaqarfimmut tassunga kaammattuivoq Nuuk ukkatareqqullugu

Siumumi siulittaasoq ersarissumik puffassimaarluni partiip Nuummi immikkoortortaqarfianit sumiiffimmi politikkikkut suliniuteqartoqarnissaanik ujartuivoq.

Siumut Nuuk, partiimut immikkoortortaqarfiugaluarluni Inatsisartut upernaakkut ataatsimiinnerat atorlugu naalakkersuisooqatigiinnut arlalitsigut isornartorsiuivoq. Maannalu Siumup siulittaasua Erik Jensen naammagiliivoq:

- Soorunami kikkulluunniit kiffaanngissuseqarput isummaminnik nittarsaassissallutik, tamanna aamma Siumut Nuummut atuuppoq. Taamaattorli erseqqissaatigissavara partiip ataatsimeersuarnermini anguniagassatut aalajangiussai sanioqqutaanngilluinnarlugit ingerlagatta, Erik Jensen Sermitsiaq.AG-mut erseqqissaavoq.

Isornartorsiuineq pissusissamisuunnginnerarpaa.

- Siumup siulersuisuini aammalu Inatsisartuni gruppiani sapinngisamik annerpaamik Siumup politikkikkut anguniagai timitalersorniarlugit sulissutiginnippugut. Immikkoortortaqarfiup nammineq parteerisaminut isornartorsiuiuarnera arlaannaatigulluunniit ilisarisinnaanngilara, taamaammallu Siumut Nuuk sakkortuumik kaammattussavara isornartorsiuiniaruni pissutsit piviusut aallaavigalugit aammalu aqqutissat eqqortut atorlugit isornartorsiueqqullugu aammalu aqqutissat eqqortut atorlugit tamanna pisassasoq inuit attaveqaqatigiittarfiini partiitta politikkikkut ingerlatai pillugit paatsiveerussaasutut pissusilersortoqarani, taanna tikkuaavoq.

Aatsitassanut inatsisissaq ukiut arfinillit naammassiniagaavoq

Siumut Nuuk siusinnerusukkut piumasaqarnikuuvoq Royal Greenland-ip siulersuisui tamarmik peersinneqassasut, tamannali immikkoortortaqarfiup angusaqarfigingaanngilaa. Maanna immikkoortortaqarfiup taassuma piumasarilerpaa aatsitassanut inatsit (UPA2023 imm. 49) kinguartinneqassasoq, taamak piumasaqarnermi tunngavilersuutigineqarluni tusarniaassutigineqarsimannginneraaneq aammalu suliaq pipallatamik suliaanerarlugu.

Partiilli siulittaasuata tamanna sakkortuumik akerlilerpaa, tassa inatsit pingasunngornermi akuersissutigineqartoq Siumut Nuup tungaaniit pipallataaneragaanera:

- Inatsisissatut siunnersuut ukiut arfinillit suliarineqarpoq, uterpara ukiut arfinillit suliarineqarpoq. Suliap ingerlanneqarnerani susassaqartut tamarmik akuutinneqarput. Tusarniaanermi akissutit quppernerit 1.200-it sinnerlugit amerlassusillit pigivagut, taamaammat uanga oqaaseqarfigissanngilara sooq immikkoortortaqarfik tusarniaanermi akissuteqarsimannginnersoq, taamaattorli erseqqissaatigissavara suliaq pipallataanngilluinnarpoq, taamaammallu Siumut Nuup tungaanit isornartorsiuineq pissutissaqanngilaq, Erik Jensen naqissusiivoq.

Immikkoortortaqarfiup sumiiffimmini sulinissaa maqaasinarnerarpaa

Erik Jensen aperineqarami qanoq ililluni immikkoortortaqarfik isornartorsiueqattaartoq qanoq ililluni eqqissisassaneraa, taassuma uteqqippaa kikkulluunniit kiffaanngissuseqarlutik isorisatik naammaginngisatillu pillugit isummaminnik nittarsaassisinnaasut, taamaattorli pissutsit piviusut aammalu piviusorsiortumik aallaavilimmik tamanna pisassasoq kissaatiginerarlugu.

- Maluginiarnarpoq Siumut Nuuk piffissami kingullermi assorsuaq isorinneqattaartoq. Maluginiarnarporlu partiip ataatsimeersuarnermini anguniagassatut siunniussai akerlilersorlugit aqqutissaq eqqortoq atornagu inuit attaveqaqatigiittarfiisigut allatigullu isornartorsiuineq siammarterneqartartoq. Uanga maqaasivara immikkoortortaqarfiup sumiiffimmini politikkikkut qanoq ingerlanneqarneranik aammalu iliuuserineqartariaqarsorisanik ukkatarinninnera suli takusinnaannginnakku. Tamanna siulersuisuni kingusinnerusukkut, Inatsisartut ataatsimiinneranni ulapaarneq qaangiussimaleriarpat qaqissagipput qularineqassanngilaq.

Erik Jensen nassuerpoq immikkoortortaqarfiit ataatsimeeqatigiinissaannut piffissaqartussaallutik, taamaattorli erseqqissaatigaa Inatsisartut ataatsimiinneranni ulloq unnuarlu sullinnerup nalaani tamanna periarfissaanngitsoq.

- Inatsisartut ataatsimiinnerisa nalaanni periarfissaqanngilagut immikkoortortaqarfiit ataasiakkaarlugit ataatsimeeqatigeqattaarnissaannut, taamaattorli pisussaaffigaarput ataatsimeeqatigisarnissaat, tamannalu piffissami aggertumi piffissaqarfigilissavarput, kisianni inuit attaveqaqatigiittarfii aammalu tusagassiuutit aqqutiginagit isitsigut naapilluta piumaarpoq, Erik Jensen naammaginnikkunnaarsimarpaseqaluni erseqqissaavoq.

Partiip ataatsimeersuarnissaa sioqqullugu avissaartuutsitsiniartoqartutut pissusilersortoqarpoq

Erik Jensen aperigatsinni nunatsinn Siumup immikkoortortaqarfii allat Siumup politikkikkut ingerlatsinera pillugu naammaginninnginnerminnik partiimut apuussisarnersut, Jensen-ip innersuussutigaa partiip november 2020-mi ataatsimeersuarnerani Siumut Qaarsut tungaannit siunnersuutigineqarsimasoq partiimi isumaqatigiinngittoqartillugu qanoq suleriuseqartoqartassanersoq isumaqatigiissutigineqarsimasoq, tassalu isumaqatigiinnginnerit saqitsaassutaasulli partiip iluani ingerlanneqartarnissaannik isumaqatigiittoqarsimanera malinneqartariaqartoq, sukkut tamaana inuit attaveqaqatigiittarfii allallu tusagassiuutit aqqutiginagit:

- Maluginiarpara partiip ataatsimeersuarnissaa sioqqullugu avissaartuuttoqarnissaanik sulissutiginnittutut pissuseqartoqartoq. Isumaqatigeereernikuuvugut partiimi isumaqatigiinngissuteqarsimagutta, taava isumaqatigiinngissutaasut partiip iluani aaqqinniartassavagut, tamannalu ataqqineqartariaqarpoq.

Siumut Nuuk oqaaseqartinniarlugu Sermitsiaq.AG-mit sulissutigaarput.

Powered by Labrador CMS