Skip to main content

Erik Jensenip qilalukkat siulittaasunngorniunnermut akuliukkai

Siulittaasussatut qinigassanngortittup Tasiilamut pisassiissutit ikilineqarsimanerat isornartorsiorpaa. Tamatuma peqatigisaanik biologit Tunumi qilalugaqatigiiaat pingasuusut nungutaanissamut aarlerinartorsiortitaalersimanerannik ernummatiginnipput.

Piniartut oqaatigisaat biologit oqaatigisaattulli isiginiarneqartigissapput. Erik Jensenip taama isumaqarnera Siumumut siulittaasunngornissaanut aqqutissiuusseqataassaaq.

Naalakkersuisut Tasiilamut ukioq mannamut qilalugartassiissutit siorna 16-init (immikkut pisassiissutit ilanngukkaanni 28-t) ukioq manna qulinut appartippaat. Qilalugartassat 2021-mi tallimanut appartinneqassaapput, tamatumalu kingorna pisassiissuteqartoqassanani. Taama aalajangiisoqarnera najukkami piniartut akornanni isornartorsiorneqarpoq, taakkuami isumaqarput naammattunik qilalugaqartoq.

- Piniartut Tasiilamut qilalugartassanik ikililerisoqarneranik isornartorsiuinerat tamakkiisumik paasisinnaavara, Erik Jensen Sermitsiaq.AG-mut oqarpoq.

Nungutaanissaat mianersoqqussutigigaat

Piniartut oqaatigigaat naammattunik qilalugaqartoq NAMMCO-mi ilisimatuussutsimik ataatsimiititaliaq naliliivoq, Tasiilami, Ittoqqortoormiini Kangerlussuarmilu qilalugaqatigiiaat nungutaanissamut aarlerinartorsiortut piniagaanerallu unitsilluinnarneqartariaqartoq. Pinngortitaleriffimmit oqaatigineqarpoq, qilalugaqatigiiaanik takusoqartarnera piviusuusoq, tamannali qilalugaqatigiit ingerlalluarnerannik isumaqartariaqanngitsoq.

Aamma atuaruk: Tunumi qilalukkat qernertat nungutaariaannaasut

-  Qilalugarpassuarnik takusoqarsinnaasarnera ilumoorpoq, ataatsimoortukkuutaanimi amerlaqalutik ingerlaarajuttarput. Taamaammat qaqqajunnamiit nasilluni qilalugaqatigiiaanik ataatsimoortukkuutaanik amerlanngitsunik qilalugartalinnik takugaanni, isigisaq tamakkerlugu qilalugaqarsinnaasarpoq, kisiannili taamaallaat 100-nik imaluunniit 100-nik arlaqanngitsunik amerlassuseqartarlutik. Ullumikkutut piniarneq ingerlatiinnarneqarsinnaassappat qilalugaqatigiinni qilalukkat 1000-inik arlalinnik amerlassuseqartariaqarput, Pinngortitaleriffimmi immikkoortortaqarfiup pisortaa Fernando Ugarte KNR-imut oqarpoq.

Taassuma tamatuma peqatigisaanik mianersoqqussutigaa, qilalugaqatigiinnik nungutsisoqassagaluarpat qilalugaqatigiinnik nutaanik pilersoqaqqinnissaa sivisussasoq.

Piniartut kisitseqataasassapput

Erik Jensenili isumaqarpoq, piniartut naliliinerat tusaaniarneqarnerusariaqartoq.

- Ullumikkut pingaartumik biologit innersuussuteqartuusarput. Taakkua innersuussutaat tunngavigalugit Naalakkersuisut pisassiissutit qanoq agguataarneqarnissaat aalajangertarpaat. Isumaqarpunga naligiinnerusoqartariaqartoq. Tamanna imatut paasineqassaaq, piniartut ilisimasaat biologit ilisimasaattulli pingaartinneqartigisariaqartut. Tamanna isumagineqassaaq kattuffiit, aalisartut piniartullu kiisalu partiit qanimut suleqatigiillutik inatsimmik naleqqussaanerisigut.

Aamma atuaruk: Isummamik allannguineq: Naalakkersuisut immikkut ittumik qernertanik qilalugartassiisut

- Biologit pisussaaffilerusuppakka piniartunik kisitsinerni toqqaannartumik peqataatitsisaqqullugit, umimmaat, tuttut, qilalukkat uumasulluunniit allat pineqaraluaraangataluunniit.

Siumup iluani eqqissiviilliorneq

Siulittaasunngorniartup isertuunnagu oqaatigaa, Tasiilami pisassiissutit pillugit apeqqut Siumup iluani eqqissiviilliuutigineqartut ilaginnaraat.

- Partiimi annertuumik oqallinnerpassuit ingerlattarsimagatsigik isertugaataanngilaq, ilaatigooriarlutalu akueriuminaatsitatsinnik akuerinnittariaqartarsimalluta. Kisianni ullumikkut aqutseriaaseq pissutigalugu isumaqatigiinnissaq ajornakusoortarpoq.

- Attuumassuteqartunut tamanut tusarnaarsinnaanissaq paasissutissallu tunngavigalugit aalajangiisarnissaq qineqqusaarutigaakka.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER